TAGBILARAN CITY, Bohol (PIA) – Inisyal nga P10 milyones ang pundo nga ipahat alang sa balaodnon nga anaa na sa ika duhang pagbasa nga magpanalipod sa kapanulundang kulturanhon sa mga Eskaya.
Ang gisugyot nga ordinansa nga ilhong Provincial Ordinance No. 015-2022 giulohanan og “An Ordinance to Conserve the Eskaya Cultural Heritage and Establish a Livelihood Development Program for the Eskaya Indigenous Cultural Community/Indigenous People and Appropriating Funds Therefor,” napabarug sa pagpadayag ni Board Member Elpidio L. Bonita.
Kahinumduman nga niadtong regular nga sesyon sa Sangguniang Panlalawigan niadtong Oktubre 14, 2022, gisugyot sa magbabalaod ang lakang sa pagpanalipud sa kulturanhong kapanulundan sa Eskaya ug pagpatukod sa Programa alang sa Pag-ugmad sa kapanginabuhian sa mga sakop niini nga nanimuyo sa mga kabukiran sa Biabas Guindulman, Lundag, Pilar, Tambongan, Candijay, Cantaub Sierra Bullones, ug Taytay Duero, samtang magpundo alang niini.
Segun pa sa National Commission on Indigenous People’s (NCIP) ang Eskaya lakip na sa 101 ka mga giila ga indigenous cultural communities sa nasud, ug kining pundok sa Bohol, nagpadayon sa ilang sahi nga sinultihan ug sinuwatan, ug pipila ka mga kinaiya nga sa ila lamang nga pundok igkita.
Apan, sanglit nanimuyo sa pungkay sa kabukiran, daghan nga serbisyo ug kaayohan sa katilingban nga nahikaw kanila.
Gipatin-aw sa mga magbalalaod nga nagtuki sa ordinansahon ang obligasyon sa Estado sa pag-ila, pagtamud, ug pagpanalipod sa mga katungod sa mga katilingban nga indigenous u gang pagpatunhay ug pag-ugmad sa ilang kultura, kinaiya, institusyon ug ilang kaayohan alang sa pagpanday sa mga palisiya sa nasud diin sila masakop.
Gidason ni BM Bonita ngadto sa mga sakop sa SP Committee on Culture and Arts isip nanguna nga komitiba sa balaodnon, uban sa SP Committee on Finance, Budget and Appropriations, Committee on Education ug Committee on barangay Affaiors nga tuyo ug tumong niining balaodnon ang paghatag og abag sa ESKAYA ICC, isip sector nga nahikawan, aron iisa ang ilang kahimtang sa katilingban ilabi na sa ilang pagpakabuhi.
Dala niini, importante nga magiyahan ang tanan nga tumong sa Ordinansa ang Heritage Conservation ug Livelihood.
Alang niini, importante usab nga mamugna ang Eskaya Indigenous Peoples Conservation and Development Plan nga manginahanglan sa suporta sa Provincial Government ug mga buhatan niini.
Ug agi og sinugdan, magpahat ang Bohol sa inisyalnga P10,000,000 alang sa pagpatuman sa Ordinansa ubos sa mga buhatan sa Kapitolyo, u gang sunod nga mga pahat, magdepende na sa Eskaya Indigenous Peoples Conservation and Development Plan.
Nunot usab niini, makabenepisyo ang mga sakop sa Eskaya ICC nga anaa sa ilang ancestral domains sa Guindulman, Candijay, Duero, Pilar, ug Sierra Bullones, lakip na ang makasubay sa ilang kagikan dinhi nga mga dapita, bisan pa kon atua na sa ubang mga dapit. (rahc/PIA-7/Bohol)
