MOPAUBOS ang gipatungod nga temporary fuel surcharge sa mga biyahe sa OceanJet sugod sa Hunyo 8, 2026, tungod sa pagkunhod sa presyo sa krudo sa miaging mga bulan. Sumala sa pahibalo sa kompanya, tungod sa pagmubo sa gasto sa sugnod, nakahimo sila og pagpaubos sa bahin sa dugang bayad nga gilakip sa pamasahe.
Hinuon, gipasabot nga bisan pa niini, mas taas gihapon ang presyo sa krudo kumpara sa kahimtang niini sa wala pa ang krisis. Tungod niini, magpadayon gihapon ang bahin sa surcharge aron masiguro nga luwas, hapsay, ug kasaligan ang pagpadagan sa ilang mga barko.
Mao kini ang bag-ong talaan sa pamasahe sa 9 ka mga ruta nga naapektuhan: Cebu – Tagbilaran: ₱920 (Tourist/Open Air), ₱1,550 (Business Class); Cebu – Ormoc: ₱1,400 (Tourist/Open Air), ₱1,950 (Business Class); Cebu – Getafe: ₱560 (Tourist/Open Air), ₱1,000 (Business Class); Tagbilaran – Siquijor: ₱950 (Tourist/Open Air), ₱1,550 (Business Class); Siquijor – Dumaguete: ₱450 (Tourist/Open Air), ₱750 (Business Class); Tagbilaran – Dumaguete: ₱1,100 (Tourist/Open Air), ₱1,750 (Business Class); Cebu – Palompon: ₱1,400 (Tourist/Open Air), ₱1,950 (Business Class); Cebu – Maasin: ₱1,400 (Tourist/Open Air), ₱1,950 (Business Class); ug Maasin – Surigao: ₱1,000 (Tourist/Open Air), ₱1,550 (Business Class).
Gipatin-aw sa OceanJet nga walay kausaban sa presyo sa ubang mga ruta nga wala nalakip sa maong pahibalo. Matod pa nila, padayon nilang bantayan ang kahimtang sa presyo sa krudo ug ilang panginahanglanon sa operasyon, ug maghimog katugbang nga pagbag-o kon gikinahanglan.
Gisiguro usab sa pagdumala nga ang maong dugang bayad o fuel surcharge temporaryo lamang ug kuhaon kini sa hingpit sa higayon nga mobalik na sa normal ang presyo sa sugnod.
Nagpabilin ang saad sa kompanya nga maghatag gihapon sila og luwas, episyente, ug kasaligang serbisyo sa dagat, samtang gipaningkamutan nga balansehon ang gasto sa pagpadagan ug ang abot-kayang presyo para sa tanang pasahero. (RTB)
