Ni Wilson Auguis Subrio
UBAY, Bohol — Tunga sa milyon ka pesos (P500,000) ang mapuno sa panudlanan niining maong lungsod kon operational na ang Puregold, isip abang sa yuta nga tukuran nga gipanag-iya sa Local Government Unit (LGU)-Ubay.
Mao kini ang gibutyag ni Mayor Constantino “Costan” H. Reyes kaniadtong Biyernes, Agosto 18, 2023 atol sa usa ka phone interview sa Bohol Times.
Ang Pure Gold Price Inc. ug LGU-Ubay pormal nga nagpinirmahay sa kontrata kaniadtong Huwebes, Agosto 17, alang sa pagsulod sa maong kompanya sa maong lungsod, diin sugdan dayon ang construction, suma ni Mayor Costan.
Matud ni Mayor Reyes, tukuron ang Puregold tapad sa Ramon Magsaysay Gymnasium sa Brgy. Poblacion nga may kapin kun kulang 4,000 square meters nga luna.
Si Gobernador Aris Aumentado kinsa nalipay ug nidawat sa maong kompanya sa pagsulod sa maong lungsod, niingon nga 1,500 ka trabaho ang mahatag niini ilabina sa taga-Ubay.
“Dako ko og pasalamat ni Gob. Aris sa iyang paningkamot kauban ni Ma’am [Kongresista] Van-van Aumentado. Dako kini og impact sa among lungsod sa Ubay,” matud sa amahan sa maong munisipalidad.
Gihulagway ni Mayor Reyes ang pagsulod sa Puregold nga usa ka “game-changer” sa ekonomiya sa Ubay.
Ang Cokaliong Shipping Lines Inc. una ng nisulod sa Ubay kaniadtong Marso 12 niining tuiga diin gisugdan ang biyahe paingon sa Cebu ug Cebu-Ubay pinaagi sa M/V Filipinas Ubay niini nga barko.
Niingon usab si Reyes nga ang Cokaliong mopuno og usa ka barko sa maong lungsod.
Ang McDonald’s una ng nipirma og kontra sa LGU-Ubay kaniadtong Hulyo 26 sa niaging buwan ug itukod sa nahimutangan sa Skies D’ Limit nga may area nga 1,000 square meters, pagtug-an pa sa mayor niining tigbalita.
Laing dakong magpapatigayon nga mao ang Gaisano mosulod usab sa Ubay matud ni Reyes ug nangita na sila og katukuran nga upat (4) ka ektarya.
Ang Puregold motukod usab og laing mga branches sa dakbayan sa Tagbilaran, Talibon, Jagna, Tubigon ug Carmen, matud sa gobernador.
Gilauman nga sa pagsulod sa Puregold, mosunod ang ubang mga magpapatigayon nga motukod sa Segundo Distrito ug ubang kalungsuran sa Bohol.
Una ng niingon si Aris sa niaging tuig nga ang Segundo Distrito usa ka “sleeping giant” isip tubag sa mga kritiko nga nagbiay-biay sa maong distrito nga mao kuno’y pinakapobre sa tulo ka distrito sa lalawigang Bol-anon.
