Ni Elvira Bongosia
TAGBILARAN CITY, Bohol, (PIA) — Ang Provincial Government of Bohol (PGBh), pinangulohan ni Gobernador Erico Aristotle Aumentado, nipahigayon og pagbisita sa San Vicente, lungsod sa Pilar, ang sentro sa African Swine Fever (ASF) outbreak sa lalawigan, aron sutaon ang kahimtang sa komunidad ug mahatagan og tabang.
Kauban ni Barangay Kapitan Christopher Lagapa, Office of the Provincial Veterinarian (OPV) Head Dr. Stella Marie Lapiz, ug Office of the Provincial Social Welfare and Development (OPSWD) Head Carmelita Tecson, si Gob. Aumentado nanghatag og indemnification nga mikabat sa P137,000.00 niadtong Sabado, Agosto 12, 2023.
Alang kini sa mga apektadong tag-iya sa baboy nga gihatagan og cash assistance nga P10,000, food packs gikan sa OPSWD alang sa walo ka apektadong pamilya, ug food packs alang sa quarantine personnel gikan sa personal nga pondo sa gobernador.
Giingong ang PGBh nagpabilin nga lig-on sa pagpanalipod sa lokal nga industriya sa baboy ug pagpalambo sa climate-smart, lig-on nga mga lakang sa agrikultura sumala sa Strategic Change Agenda.
Ang higpit nga mga lakang aron mapugngan ang transmission sa ASF nagpadayon pinaagi sa Executive Order No. 41, inubanan sa Memorandum Order No. 2023-0074.
Nagpabilin nga ASF-Free ang lungsod sa Pilar ug ang tibuok lalawigan sa Bohol karong adlawa human milabay ang pila ka adlaw nga walay laing kaso sa ASF virus nga mikatap sa mga silingang barangay sa lungsod sa Pilar ug mga kasikbit nga lungsod.
Unang gikuhaan og “blood sample” ug pakisusi ang gikatahong pagpangamatay sa mga baboy sa Purok 6, San Vicente niadtong Hulyo 25. (ECB/PIA7 Bohol)
