UNA sa tanan, kumusta mga suking tigbasa niining pamantalaan ug niining akong lindog? Hinaot ana-a kamo sa maayong panglawas ug padayong magtakin og positibong panglantaw taliwala sa kalisod ug kagubot sa atong katilingban.
Ang Department of Public Works and Highways (DPWH) maoy giila nga usa sa ‘pinakakurakot’ o pinakakorap gayud nga ahensya sa gobyerno sa Pilipinas. Dili ba?
Gani, kon ang ordinaryong katawhan ang pasultihon, ang pasabot kuno sa DPWH = Daghang Project Wa’y Human ug daghan pa.
Buot pasabot, bisan ang matag Juan Dela Cruz nakahibawo mismo sa pamunoan sa maong departamento, bisan kinsa pa ang naglingkod o molingkod.
Mao kini giingon nga nakaugat na gayud ang maong sistema sa nasud Pilipinhon.
Ang dakong pangutana: mabag-o pa ba ang liderato sa maong ahensya? O ang mga maayong kalsada maoy kanunay bag-uhon aron makasapi ang mga politiko ug mga tawo nga ana-a sa DPWH? Nangutana lang.
Suma sa Unang Linya ni Sir Johnny Orioque, dako kaayo ang proposed budget sa DPWH karong 2024, nga kasamtangang gilihok sa mga magbabalaod sa duha ka Balay-Balauranan.
Ang gisugyot nga pundo sa DPWH sunod tuig ana-a sa P822.2 bilyones, kini dakong kabhang sa proposed budget sa 2024 nga P5.7 trilyones.
Ang Department of Education kun DepEd maoy nag-angkon sa pinakadakong proposed budget nga P924.7 bilyones.
Mao diay nga bisan maayo pa kaayo nga kalsada bungkagon o gub-on aron sementuhon na pud.
Sulod sa pipila ka dekada, wala ba diay kini nakit-i sa atong gobyerno nga dako kaayong kuwarta ang nasayang sa usa lang ka ahensya? Imposible pud siguro.
Ang pangutana, unsa may gibuhat sa atong gobyerno ilabina sa kasamtangang administrasyon ni Presidente Bongbong Marcos, Jr.?
Ang mga kalsada ug tulay kanunay na lang gub-on aron magamit ang pundo nga gitagana sa matag tuig.
Ug ang kanunay maproblema, mao ang katawhan nga maperwisyo sa pag-agi sa mga kalsada ug tulay kay gipangbakbak. Ang makapungot, bakbakan og pipila ka blocks, unya sa unahan, bakbakan na pud. Maoy makaangin sa hinay nga dagan sa trapiko, kon dimalason, makaangin pa sa disgrasya sa mga motorista.
Samtang ang katawhan nag-antos sa mga kalaki sa taga-DPWH ug mga korap nga opisyales sa gobyerno, puwera sa dili korap, daghang niburot ang bulsa.
Ang maayong himuon sa mga magbabalaod, “hatagan lang og igo nga pundo ang DPWH” aron dili na masayang ang salapi sa katawhan. Ug siguraduhon nga dili sub-standard ang materyales nga gigamit.
Atong hunahunaon nga daghang mga agianan ang wala pa masemento ug naglubak-lubak ilabina sa kabukiran o suok-suok o lagyong lugar, samtang ang taga-DPWH ug mga nalambigit nga lider, nagpahayahay sa ilang nadawdaw nga minilyon kon dili man binilyon nga kuwarta.
Daghang mamahimong kapadulngan sa dagkong salapi kon itunong lang gayud.
Ana-a ra gayud sa political will sa atong mga lider ang pagsulbad sa korapsyon ilabina sa maong ahensya. Ug sa katawhan nakasangon ang pagpili sa kasaligan ug tarong nga mga suluguon.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
