WALO ka mga opisyal ug kawani sa Port Management Office sa pantalan sa syudad sa Tagbilaran ang gitaktak dayon tungod sa pag-inom sa maong buhatan.
Si Philippine Ports Authority (PPA) General Manager Jay Santiago niingon nga ang party ug inom nakita sa CCTV sulod sa ilang multi-purpose hall kaniadtong Agosto 16.
Matod niya nga lakip sa gitaktak mao sila si Bohol Acting Port Manager Tyrone Agaton kinsa nagsaulog sa iyang adlawng natawhan sa nahisgutang adlaw, PMO-Bohol Services Division Manager Julius Jumang-it ingon man sila Atty. Sherlito Columnas Jr. sa Legal Department, Safety Officer Atty. Romeo Cabading II ug Port Police Edcel Epan, Victor Cagulada, Mary Maricka Aguirre, Meljann Oronan, ug Emily Ross Tubio.
Sa inisyal nga imbestigasyon nasuta nga dunay mga gamit sa opisina ang gigamit sa personal nga selebrasyon.
Gitataw ni Santiago nga usa kini ka matang sa pagpangabuso nga gihimo sa mga opisyal nga migamit sa pasilidad sa gobyerno nga gitumong sa paghatag og serbisyo sa katawhan. (RTB)
