MAO kini ang mando ni Governor Aris Aumentado human sa makuting pakisusi kabahin sa GMO (Genetically Modified Organism) corn nga gipananum dinhi sa atong probinsya.
Mipagawas si Gov Aris sa maong mando pinaagi sa Executive Order No. 30 nga iyang giluwatan. Ang mga experto gikan sa University of the Philippines, Los Baños, Laguna, mipasabut sa mga ekonomikanhon, siyentipikanhon ug moral nga basihanan kung nganong dili gayud angay nga itanum ang mga GMO nga mais, talong, kamatis ug uban pang matang niini.
Isip ehemplo, mahimong ilarawan sa inyong huna-huna kini: Pananglitan, maoy gipangangkon sa mga tigpasiugda sa GMO nga kuno kini usa ka pamaagi aron pagpalambo sa kinabuhi. Ang mga baki bisag mauwanan o maintan, dili hilantan, dili masakit. Busa, aron maangkon sa tawo ang maong resistensya, matud sa mga tigpaisugda sa GMO, mahimong kuhaan og genes ang mga baki ug ibutang sa tawo aron ang tawo dili usab masakit bisag mauwanan o maintan.
Pangutana, mosugot ba mo nga butangag genes sa baki ang inyong lawas? Dili ba kini usa ka insulto ngadto sa Dios, nga ang iyang binuhat ato pa gyung hilabtan aron kunohay dugayng mamatay? Aduna bay kasegurohan sa mamahimong resulta sa maong pagpanghilabot tawo sa binuhat sa Dios?
Ang tubag sa mga ekperto sa maong mga pangutana mao kini: Basta hilabtan gani ang genes sa mga binuhat sa Dios, dili na kini mahiuli sa iyang natural nga kahimtang ug dili na matag-an kon unsa ang dangatan niini sa kaulahian kay dili man kita Dios, mga tawo ra man ta.
Unsa may nahitabo sa mga GMO corn nga gipananum dinhi sa ato? Kana nga matang sa GMO, matud sa gipangangkon sa mga tigpasiugda, mas taas kunog abut kay sa ordinaryong mais. Makapalit kuno tag pick up o van nga sakyanan tungod sa kadaku sa kita. Kwarta, sapi, Mammon, kana maoy gipakadak-an.
Sa pikas bahin, wala panumbalinga ang epekto niini sa kalikopan ug ang moral nga aspeto sa pagkawalay-kasigurohan sa mahitabo unya niini. Gani, mismo ang eksperto nga gikan sa Department of Agriculture Region 7 nagsulti nga ang GMO corn ug ang hybrid corn mao-mao rag kita. Nan, kon mao kana, nganong ipamugos man gyud ninyo ang GMO pagtanum? Duna bay nagpaluyong mga hinungdan tali sa dagkung negosyo nga giila sa ngalan nga Monsanto o Bayer?
Kining mga kompanyaha gibaniug na nga napildi sa mga kaso didto sa USA tungod sa pagkapeligroso sa ilang pipila ka mga produkto nga nakadaut sa panglawas sa tawo ug kinaiyahan. Pero nganong ipamugos man gyud?
Busa, niadtong tuig 2003, si Governor Erico Boyles Aumentado ug Vice Governor Julius Herrera mideklarar nga ang Bohol usa ka GMO-Free Province ug bawal ang tanum nga GMO dinhi. Karong bag-o ang atong Korte Suprema mipagawas usab sa mando nga ihunong ang pagpananum niini.
Busa, lig-on kaayo ang sukaranan sa Executive Order No. 30 ni Governor Aris Aumentado. Usa kini ka bulawanong legacy sa iyang amahan. Ug kini suportado sa Simbahan. Atong ipatuman. Atong suportahan.
