GITUGYAN sa kagamhanan sa lalawigan sa Bohol pinaagi sa Prov’l Agriculture Office ang mga agricultural farm input ngadto sa kabatan-onan ug urban farmers sa pipila ka mga tunghaan sa Bohol.
Kini may kalabutan sa proyekto nga “Glamorizing Farming through Urban Agriculture” nga gisugdan kaniadto ni kanhi bise-gobernador Dioning Balite.
Sumala pa ni bise-gobernador Victor Balite nga ang mga batan-on karon ang gitumong nga ilambigit sa urban farming tungod kay nabantayan sa lokal nga kagamhanan nga nawala na ang kaikag sa mga batan-on sa pagpananom ug pag-ila sa tanom.
Niingon si Balite nga pinaagi sa maong programa mahimamat sa mga batan-on ang agrikultura diin gipaningkamutan nila nga mabuhi pagbalik ang interest sa mga batan-on sa pagpananom.
Giingon sa bise gobernador kinsa mao ang pangulo karon sa komitiba sa agrikultura sa Sangguniang Panlalawigan (SP) nga i-introduce sa training sa mga nisalmot ang bag-ong teknolohiya sama sa soilless planting technology ug ang newspaper technology.
Matud ni Balite nga ang maong pamaagi makahatag og kakuryoso sa mga batan-on diin mapursigido na unya sila sa pagkat-on.
Pipila ka mga urban barangays ug pampublikong eskwelahan ang nisalmot sa maong programa uban sa Department of Education (DepEd) diin gidasig nila sa pagsalmot ang ubang pampublikong tunghaan aron usab mabuhi ang ilang pagpananom og mga utanon. (RTB)
