NISANG-AT og reklamo ang mga opisyal sa Bohol Clean Water Alliance (BCWA) tungod sa graft and corruption batok sa mayor sa lungsod sa Balilihan ug ubang mga opisyal sa gobyerno tungod sa giingong paghatag og usa ka fraudulent water permit.
Ang reklamo gisang-at batok nila ni Undersecretary Analiza Rebuelta-Teh sa Department of Environment and Natural Resources (DENR); Undersecretary Rosemarie Edillon sa National Economic Development Authority (NEDA); Senior State Counsel Rosario Elena Laborte-Cuevas sa Department of Justice (DOJ); Director Juanito Batalon sa Department of Science and Technology (DOST); Director Roberto S. Soriano sa National Hydraulic Research Center (NHRC); Executive Director Sevillo D. David sa National Water Resources Board (NWRB); ug Balilihan Mayor Maria Pureza Veloso-Chatto atubangan sa Office of the Ombudsman.
Ang 25-panid nga reklamo nagpakita nga ang mga reklamante sila si BCWA chairman Emmanuel Ramasola ug presidente Erastus Leopando nag-akusar sa mga miyembro sa NWRB nga sila Rebuelta-Teh, Edillon, Laborte-Cuevas, Batalon, ug Soriano nga “with manifest partiality, evident bad faith, and gross negligence” sa dihang ilang gipamatud-an ang kabalido sa “fraudulently acquired” conditional water permit (CWP No. 01-22-20-008) nga giisyu ngadto sa local government unit (LGU) sa Balilihan, Bohol.
Gitataw usab nila nga grabeng pagpabaya ang gihimo ni David sa NWRB tungod sa giingong kawalay aksyon niini sa dihang gitugotan niya ang iyang mga kauban nga mo-issue sa resolusyon nga naghatag sa Balilihan LGU og water permit kung wala kini katungod.
Ang mga nagreklamo miingon nga si Chatto kinahanglan usab nga pasakaan og kriminal nga kaso sa paglapas sa Section 3(e) sa Anti-Graft and Corrupt Practices Act, tungod sa “pakigkonsabo sa ubang mga respondents” bisag nahibaw-an nga bakak ug malimbungon ang nakuha niini ug human naka-conclude si Respondent David nga null and void ab initio ang CWP.”
“Ang mga respondents kinahanglang pasakaan og criminally charges kay naghatag sila ug unwarranted benefit ug preference sa LGU Balilihan,” matud pa nila sa reklamo.
Ang gikuwestiyon mao ang NWRB Resolution nga pinetsahan ug Hunyo 2, 2022 nga giingon sa mga reklamante nga “gipahimuslan ang mga konstituwente sa Barangay Magsaysay ug Sevilla, Bohol,”
“Kini mao ang kataas sa inequity alang sa LGU Balilihan sa paggamit sa tubig nga nakuha gikan sa Bugwak Spring sa Barangay Magsaysay, Sevilla, Bohol. Kini usa ka pagbiaybiay sa teritoryal nga hurisdiksyon sa Barangay Magsaysay ug Sevilla tungod kay ang LGU Balilihan wala makakuha sa ilang pagtugot, labi na nga dili sila ipahibalo, sa wala pa magsugod ang pagtukod sa proyekto sa suplay sa tubig o bisan sa pagpangayo og permiso gikan sa Barangay Magsaysay o gikan sa LGU Sevilla,” ingon sa reklamo.
Usa ka NWRB ocular inspection niadtong Disyembre 2021 nagbutyag “nga ang aktuwal nga extraction point/eksaktong lokasyon sa Bugwak Spring diin nahimutang ang giaprobahan nga Conditional Water Permit sa LGU Balilihan, anaa sa Brgy. Magsaysay, Sevilla, Bohol,” matod sa mga reklamante. (RTB)
