MAS gipalig-on ug “sustainable” pa ang sektor sa turismo sa Bohol pinaagi sa “Revenge Travel” trend kon diin 198% ang pagsaka sa Tourist Arrivals gikan 2021 ngadto sa 2022.
Gilamoan ang pag-abot niini sa 1 milyon karong hinapos sa tuig.
P7.3B ang income sa tourism businesses ug stakeholders sa niageng tuig samtang “as of May 2023” niabot na sa P3.8B .
Dunay mga dugang international flights na ang mo-byahe gikan Panglao Airport ngadto sa ubang nasud.
Nilusad sa Asiana Air ang ilang maiden flight gikan Incheon, South Korea paingon sa Panglao niadtong Hulyo 20 samtang karong Hulyo 25 ang Royal Air Philippines sugdan na ang ilang flight ( Kunming City, China to Panglao).
Gumikan sa UNESCO Global Geopark status sa lalawigan sa Bohol, ang kagamhanang probinsyal mobandera sa 17 Geosites ug kasamtangang mougmad sa bag-ong Tourism Circuits sama sa Farm, Fork, Fitness Tour, Outdoor Adventure Trail, UNESCO Geotrail, Motorbike loops ug uban pa.
Gi-endorso na usab sa Department of Tourism ang ang umaabot programa sa kagamhanang probinsyal nga Transforming Communities Towards Resilient, Inclusive and Sustainable Tourism (TouRIST) Program.
Ang World Bank-funded program dako ang ikatabang sa lalawigan sanglit maka-implementar man ang Bohol sa mga proyekto nga maka-benepisyo sa turista lakip na ang katawhan.
Ang Bohol bag-ohay lamang nipahigayon sa Miss Bohol 2023 nga gidayeg sa kadaghanan isip “Best Production” sa kasaysayan sa Miss Bohol pageant. (Kahlil Lester O. Camba)
