MATUD ni Presidente Bongbong Marcos Jr. “the SONA is sound and improving” sa pagkahuman niini.
Sa maong ikaduhang State of the Nation Address (SONA) ni PBBM, iyang giyagyag ang nahimo sa iyang administrasyon sulod sa usa ka tuig.
Niingon si PBBM nga nagpabiling usa sa mga “fastest-growing economies” sa ASEAN Region ang Pilipinas.
Usa usab sa daghang gihisgutan sa Presidente mao ang imprastruktura, nga matud niya, ang development plan sa nasud nakatutok sa investments sa public infrastructure. Dugang niini nga niabot og 600K kilometro ang farm-to-market road ang nahimo.
Matud sa GMA News Integrated Research, niingon ang NEDA nga niabot og P8.3 trilyones ang kantidad sa 194 infra flagship projects ni administrasyong PBBM.
Ang revenue usab sa BIR karong tuiga niabot og P1.05 trilyones karong tuig, suma sa Pangulo.
Sa mga nag-unang pamaliton, niingon ang Presidente nga nakita kuno ang pag-ubos sa presyo sa bugas, isda ug asukal. Maihap na lang kuno pud ang adlaw sa mga smuggler ug hoarder sa maong mga pamaliton.
Samtang ang Department of Agriculture (DA), nakapanghatag og 50M nga binhi sa humay ug 1M nga binhi sa mais.
Gipasigarbo usab ni Marcos Jr. nga ang Kadiwa Stores nakapabenepisyo sa 1.8 milyones nga mga Pinoy, nakakolekta og P700 bilyones ug niingon nga ipalukop sa tibuok nasud diin anaay kasamtangang 3,000 ka tindahan.
Samtang sa lima (5) ka buwan sa 2023 (Pebrero-Hunyo), nagsunod-sunod ang pag-ubos sa inflation rate sa Pilipinas, base sa datos sa Philippine Statistics Authority (PSA).
Sa hisgutanan sa korapsyon nga naila ang Pamilyang Marcos, niingon ang anak nga Presidente nga, “We cannot tolerate corruption and incompetence in gov’t.”
Executive Order (EO) nga maghatag og “amnestiya” alang sa mga rebeldeng mobalik sa sabakan sa gobyerno, ipagawas ni PBBM.
Niabot og 70,000 ka mga titulo sa yuta ang napanghatag sa mga Agrarian Reform Beneficiary ug daghan pa’ng gitaho sa ika-17 nga Presidente sa Pilipinas.
Sa kinatibuk-an, niingon si PBBM nga iyang pangandoy nga makabaton og “maginhawa, matatag at panatag na buhay para sa lahat”.
Apan bisan pa man niini, ang mga netizens niingon nga “inaccurate, ironic and lacking data” ang SONA 2023, buot pasabot, wala nakuha sa katawhan ang ekspektasyon nila sa maong SONA.
Nidugang pa nga mura’g wala sa Pilipinas si PBBM kay wala kakita sa mga problema sa nasud.
Ikaw, unsay imong istorya sa SONA 2023 ni PBBM? Sakto ra? Gikuwangan? Unsa man?
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
