Ni: Wilson Auguis Subrio
Pasidunggan sa Kagamhanang Probinsyal sa Bohol (PGBh) ang mga sakop sa Provincial Disaster Risk Reduction and Management Office, Philippine Ports Authority – Port Management Office Bohol, ug Philippine Coast Guard nga nitabang sa pagresponde sa nasunog nga MV Esperanza Star sa kadagatan sa Doljo, Panglao sa niaging buwan.
Moa kini ang gipahibawo ni Gobernador Aris Aumentado sa social media.
“Personal kitang nagpasalamat sa mga personalidad ug sa mga ahensya sa Provincial Disaster Risk Reduction and Management Office, Philippine Ports Authority – Port Management Office Bohol, ug Philippine Coast Guard diin nitabang sa pagresponde sa nasunog nga MV Esperanza Star sa kadagatan sa Doljo, Panglao niadtong Hunyo 18, 2023,” matud ni Gob. Aumentado.
Nitambong sa maong panagtapok ang Provincial Government Department Head Dr. Anthony Damalerio sa PDRRMO, Mr. Elmer Chavez sa Elzon Fishing and Trading, PPA-PMO Bohol Head Lord Tyrone Agaton, PCG Western Bohol commander Lt. Wenceslao John Wenceslao, ug uban pa.
Gi-imbitahan usab sila ni Gob. Aris karong Hulyo 22 alang sa selebrasyon sa Bohol, kay hatagan sila og pasidungog sa ilang maayong buhat nga pagsalbar sa mga pasahero sa maong barko.
