TINGUHAON sa kagamhanan nga makahipos ang mga micro-small ug medium enterprises nga musalmot sa 2023 Sandugo Trade Expo sa Department of Trade and Industry og labing menos P15 milyones sa aktwal ug booked sales.
Kini maoy gipaambit ni Trade Promotions Specialist sa DTI Bohol nga si Rey Anthony Regis, didto sa Kapihans a PIA.
Matud ni Regis nga ilang gipaubsan ang ilang slaes targets karon, sanglit sayud ang ilang buhatan nga mao pay pagsugod og kabuhi sa ekonomiya ug daghan pang mga producers ug mga buyers nga wala na magkakitaay human sa duha ka tuig nga pandemya.
Kahinumduman nga mihukom ang DTI Bohol sa pag-undang una sa labing taas nga trade ug products showcase sa Bohol, diha nga ang pagpahimutang niini, mahimong maoy hinungdan sa pagtakod na hinuon sa sakit.
Hinuon, bisan pa niini, gihimo sa DTI ang local nga products showcase nga giilang “Mugnang Bol-anon.”
Gipasabut ni Regis nga ang Mugnang Bol-anon, paningkamot sa mga tinugyanan nga masumpay pa gihapon ang mga producers ug mga buyers, bisan kon sa online o limitado nga paagi, aron may mahipos pa usab ang mga manufacturers nga halin bisan sa nagtinga nga ekonomiya.
Gisaysay usab sa DTI nga bisan sa pandempa, wala moundang ang pagpakat-on ug pagpanindot sa hinuon sa mga produkto nga ginama sa kamot sa mga Bol-anon.
Karon’g tuiga, sugod sa Hulyo 19-23, ihikyad na usab sa DTI ang Sandugo Trade Expo nga bukas na usab s amga regional exhibitors ug dili lamang mga Bol-anon, pahibaw ni Regis.
Ang Sandugo Trade Expo maghikyad sa mga produkto nga wearables sama sa kwentas, aryos, singsing, mga bags, mga baskets, mga kalo, mga gamit sa balay ug mga appliances, mga muwebles o furniture, mga produkto sa wellness ug giproseso nga mga pagkaon.
Gipasalig usab sa DTI nga bisan sa pandemya, wala sila moundang sa pagtabang sa mga producers sama sa paghatag og mga product development seminars ug training, design enhancement u gang paghimog nga pisikal nga kausaban s amga proseso aron mas mamenosan pa ang usik sa gasto, ug oras nga magamit sa paghimo sa produkto.
Alang sa Sandugo Trade Expo 2023, makit-an ug mapalit usab sa mga Bol-anon ang mga produktong mugna dinhi nga ika-ambas na sa mga produktong langyaw, pasalig sa DTI. (PIA-7/Bohol
