Ni: Wilson Auguis Subrio
Ang mga lungsod sa Loay, Dimiao ug LGU-Valencia nakadawat og suma-total nga P10,600,000.00 nga ayudang-pinansyal gikan sa Kagamhanang Probinsyal sa Bohol nga gipangunayan og hatud ni Gobernador Aris Aumentado.
Kini ang gipaambit ni Gob. Aumentado sa social media.
“Sa atong pagbisita sa mga barangay sa mga Lungsod sa Loay, Dimiao ug LGU Valencia, atong personal nga giturn-over ang pinansyal nga tabang gikan sa Kagamhanang Probinsyal nga nagkantidad og P10,600,000 alang sa mga proyekto sa ilang komunidad,” matud ni Gob. Aris.
Ani-a ang mga benipisyaryong barangay ug lungsod:
LGU-Valencia – P10,000,000 alang sa pagpalit og thermal decompositor nga makasulbad sa ilang problema sa solid waste.
Brgy. Botoc Oriental, Loay – P240,000 alang sa konstruksyon sa Barangay Daycare Center. Gikan kini sa mga buhatan nila ni Bise-Gobernador Dionisio Victor Balite, Board Members Tita Baja, Greg Jala, Elpidio Bonita, ug Nathaniel Binlod.
Brgy. Las Salinas Sur, Loay – P225,000 alang sa rehabilitasyon sa ilang Farm-to-Market Road o FMR. Gikan kini sa mga buhatan nila ni BG Balite, Board Members Baja, Jala, Bonita, Binlod, Romulo Cepedoza, ug Gloria Gementiza.
Brgy. Luyo, Dimiao – P95,000 alang sa improvement sa ilang Day Care Center. Gikan kini sa mga buhatan nila ni BM Baja, Jala, Bonita, ug Binlod.
Brgy. Yanangan, Loay – P40,000 alang sa pagtaod sa mga Solar LED Street lights. Gikan kini sa mga buhatan nila ni BM Baja ug Jala.
“Aron maangkon sa mga kabarangayan ang uban pa nga mga ayuda sa Kagamhanang Probinsyal, ilabi na ang P200,000 alang sa mga priority projects, atoa silang gi-awhag nga i-liquidate dayon ang maong mga tseke,” matud sa amahan sa probinsya.
