Ni: Wilson Auguis Subrio
Niabot og P525,000.00 ang gidalang ayudang-pinansyal ni Gobernador Aris Aumentado gikan sa Kagamhanang Probinsyal sa Bohol alang sa tulo (3) ka mga barangay sa Duero nga make ang Angilan, Duay ug Lobogon.
“Ania na kita sa tungang bahin sa tuig 2023, apan padayon lang gihapon ang atong pagserbisyo sa katawhan,” matud ni Gob. Aumentado.
“Sa pagbisita nato sa tulo ka mga barangay didto sa Lungsod sa Duero, atong gipaminaw ang yangongo sa mga opisyales ug katawhan sa maong mga komunidad ug gitunol usab nato ang mga financial assistance gikan sa Kagamhanang Probinsyal,” dugang niini.
Na-grasyahan ang Brgy. Angilan, Duero og P245,000 alang sa konstruksyon sa Manpower Development Center – Flooring sa basketball court, ug fabrication sa movable ring. Gikan kini sa mga buhatan nila ni Bise-Gobernador Balite, Bokal Tita Baja, Greg Jala, Elpidio Bonita, Nathaniel Binlod, Gloria Gementiza, ug Christian Bolos III.
Ang Brgy. Duay, Duero gitunulan og P240,000 alang sa pag-install sa kinse (15) ka mga solar streetlights sa ilang barangay road. Gikan kini sa mga buhatan nila ni Bise-Gobernador Dionisio Victor Balite, Bokal Tita Baja, Greg Jala, Elpidio Bonita, Nathaniel Binlod, Gloria Gementiza, ug Christian Bolos III.
Samtang ang Brgy. Lobogon, Duero gihatagan og P40,000 alang sa mga socio-cultural activities isip kabahin sa selebrasyon sa ika-113 na Foundation Day sa maong barangay. Gikan kini sa mga buhatan nila ni BG Balite, Bokal Baja, Bonita, ug Binlod.
“Ato silang gisultian nga i-liquidate dayon ang mga nadawat na ayuda aron makadawat pa sila sa ubang mga tabang gikan sa Kagamhanang Probinsyal, hilabi na ang P200,000 alang sa mga priority projects,” pagpahinumdom sa kasamtangang amahan sa mga Bol-anon.
