NAPUKAW na usab ang kagubot sa malinawon nga lalawigang Bol-anon: gobyerno pinaagi sa militar batok gidudahang sakop sa rebeldeng NPA.
Kada tuig na lang nga walay sipyat nga magka-engkwentro ang puwersa sa gobyerno ug ang walhong grupo.
Nahimo na kining normal sa katawhan ilabina sa puwersa sa gobyerno ug NPA kon magkaabot ang ilang mga dalan.
Kon suma-hon, walay mogawas nga mananaug kay pulos ra man mga Bol-anon, pulos ra man mga Pinoy ang nanggiunay.
Ang kumon nga rason sa sakop sa walhong mga grupo mao ang pagpakigbisog sa ilang mga katungod ilabina ang mga mag-uuma o pobreng katawhan nga gihikawan sa gobyerno sa kon unsa ang alang gayud kanila.
Anaay mga higayon usab nga gisakyan sa mga kurakot nga opisyales sa gobyerno ang panahon aron paburan ang ilang interes. Ug ang ordinaryo ug kabus nga katawhan maoy masakripisyo.
Sa lugar sa militar ug ubang puwersa sa gobyerno, ila usab nga gipuy-an ang ilang tahas — ang panalipdan ang estado ug ang katawhan sa gustong mogubot niini.
Sa mga panagbangi o away, kinahanglan nga mopatunga ang kalinaw. Seryosuhon ang mga “peace talks” nga sabutan sa duha ka pundok: tali sa gobyerno ug mga rebelde.
Kon magsige og pataasay sa garbo, lagmit dili mahuman ang kagubot.
Si Gobernador Aris Aumentado sa usa ka pundok niingon nga sementuhon ang lubak-lubak nga mga kadalanan ilabina sa mga bukid ug suok-suok nga lugar sa pamasin nga wala na’y mohawa sa sabakan sa gobyerno.
Apan ana-a ang pangagpas sa uban nga dili gayud mahanaw ang mga NPA o mga walhong grupo kay maniid sila kon unsay mga hiwing lakang sa mga lider.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
