TAGBILARAN CITY, Bohol (PIA) –Apil na usab ang mga buhi nga baboy, karne, produkto gikan sa karne sa baboy, gipakaging nga duga sa baboy, lawog ug giproseso nga karne sa bisan unsa ka gamay basta gikan sa Negros Oriental ug Occidental ang gidid-an sa pagsulod sa Bohol.
Pinaagi sa Executive Order No 29, series of 2023 nga gilagdaan ni Gobernador Erico Aristotle Aumentado niadtong Hunyo 5, 2023, gimanduan na usab ang tanan nga local government units, subay sa Section 16 sa Local Government Code, sa paggamit sa ilang natugyan nga gahum nga gikinahanglan aron estrikto nga ikapatuman ang gikinahanglang aksyon alang sa pagpatunhay sa kaayohan sa kinabag-an.
Kini nga pagpagawas sa Executive Order human minggawas ang mga balita gikan sa Negros Occidental nga nagtaho si Gobernador Bong Lacson ming kompirmar na sa namatikdan nga kaso sa African Swine Fever (ASF) didto sa Pulupandan, samtang ang mayor sa Bacolod City nga si Alfredo Benitez mipadayag na usab nga naigo na ang Bacolod City.
Sa laing bahin, gikataho sa usa ka establisemento nga tigpabita kabahinsa kaso sa ASF didto sa lungsod sa Dauin Negros Oriental, diin gimandu na sa mayor nag si Galicano Truita ang dinali-an nga pagpanghipos sa mga baboy nga gibuhi sulod sa 500 metros nga nagpalibot sa lugar nga may nakompirmar nga kaso sa ASF.
Kini nga mga taho nagpasamot sa kakuyaw sa Bohol tungod kay sa Central Visayas, bugtong Bohol ug Siquijor na lang ang luwas pa sa ASF.
Ang kakuyaw napagrabe tungod sa regular nga byahe sa barko gikan sa Dumaguete paingon sa Bohol, samtang may posibilidad nga sa kadaghan sa byahe sa Dumaguete ngadto sa Siquijor, mahimong mapadali niini ang pagpatabok sa kagaw pasulod sa Bohol sakay sa mga barko.
Ug aron ikapadayon sa Bohol ang pagtukaw sa pagpatuman sa mga lakang aron pagpugong sa pagsulod sa nahisgutang grabe ka mananakod nga sakit sa baboy, gipahinumdom sa gobernador ang paragraph 1 section 3 sa Provincial Ordinacne No 2022-011 nga epektibo pa gihapon ang pagpugong sa pagpasulod sa mga nahinganlang mananap, mga karne, parte sa baboy, giproseso man o giluto na, basta gikan sa mga lugar nga apektado sa ASF.
Ang Bohol hugot gyud nga nagabantay tungod kay ania usab dinhi ang dul-an sa P6 bilyon nga industriya sa pangbabuyan, diin kapin sa 85% niini, anaa sa mga kusinahan sa mga residente ug dili ingon ka baga sa commercial nga produksyon.
Ang pagpangbabuyan kasagaran maoy gisaligan nga pangita sa mga yano nga mag-uuma, ug maoy gisaligan sa pagpaeskwela sa ilang mga anak. (PIA-7/Bohol)
