GIPAHIGAYON na usab ang Sandugo Trade Expo 2023 sa Tagbilaran City sa unang higayon sukad nga gisuspinso ang tinuig nga trade fair niadtong 2020 tungod sa COVID-19 pandemic.
Si Rey Anthony Regis, trade specialist sa Department of Trade and Industry (DTI) sa Bohol, niingon nga ang lima ka adlaw nga fair, ang gikatakda kaniadtong Hulyo 19 hangtod kagahapon Hulyo 24, 2023 sa Island City Mall, ug gisalmotan sa 100 ka exhibitors gikan sa Visayas, Mindanao ug Luzon.
Matod ni Regis, ang Sandugo Trade Expo gi-privatize sa unang higayon ug giorganisar kini sa Alturas Group of Companies kini subay sa mandato sa ahensya nga likayan ang pagpahigayon og trade fairs.
“Usa sa mandate namo sa DTI mao ang hinay-hinay namo nga e-privatize ang pag conduct og trade fair. Dili na mi pwede mo kolekta og mga payments gikan sa atong mga exhibitors. Unya dili man pud pwede na atong undangon atong trade fair kay dako mani kaayog tabang sa atong mga negosyante sa Bohol mao nga nakig partner ta sa ICM,” matod ni Regis.
Ang opisyal sa DTI midugang nga ang pribatisasyon gituyo usab aron makunhuran ang gasto sa ahensya.
Si Regis niingon nga ang DTI nigahin lang og P200,000 alang sa maong kalihukan, gikan sa P1 milyon, kay motabang lang kini sa Alturas Group sa pag-organisar sa maong kalihukan.
Matod ni Regis, ang Sandugo Trade Expo karong tuiga nakatigom og labing menos P15 milyones nga halin.
Lakip sa gibaligya sa expo mao ang processed food, furniture, dekorasyon, handicrafts, fashion accessories ug uban pang locally made products.
Kaniadtong 2019, sa wala pa mobuto ang pandemya, ang Sandugo Trade Expo nag-post sa record-breaking nga halin nga P40 milyon. Nakadani usab kini mga 190 nga exhibitors gikan sa tibuuk nasud. (RTB)
