TAGBILARAN CITY, Bohol (PIA) – Alang sa mas epektiboo nga mga ruta nga maka-alagad sa kadaghanon sa pasahero ug sa matang sa sakyanan nga mosubay sa ruta nga mag-agad usab sa matang sa dalan, gikinahanglan nga ang lungsod mismo ang maghikay sa ilang Local Public Transport Route Plan (LPTRP).
Kini maoy gipasabut pag-usab sa Land Transportation Franchising Regulatory Board (LTFRB) Region 7 didto sa tigum nga magtubag sa mga hisgutanan nga nakaangin sa kamahal sa presyo sa pletehan ug panakyanan sa Bohol.
Usa sa mga napalutaw nga isyu sa kamahal sa pletehan, dala sa walay napahimutang nga ruta nga agi-an sa mga depasaherong sakyanan sa mga lugar sa kalungsuran nga may daghang tawo, saysay ni Dondon Ibo, technical Director sa LTFRB 7.
Kini usab tingod sa kapakyas sa LGU sa pagpahimutang sa mga ruta nga unta ilang trabaho subay sa participatory planning process, dason sa LTO.
Mismo ang lungsod o syudad ang maglatag sa ilang LTPRP sa mga ruta nga sulod sa lunsgod, samtang ang kagamhanang Probinsyal ang laghimo sa mga ruta nga motadlas sa mga kalungsuran ug syudad.
Ang Probonsya usab ang maghimo sa ruta tadlas sa mga lalawigan, samtang ang Department of Transportation ang maghimo sa mga ruta nga motabok sa mga rehiyon, tadlas sa mga Independent Cities ug sa mga kalungsuran sulod sa Metro Manila, segun sa LTFRB.
Kon mapahimutang na ang Draft LPTRP, kinahanglan kini nga iduso ngadto sa LTFRB alang sa pagrepaso kon kini nahasubay ba sa lagda, ug dayon isyuhan sa LTFRB sa notice of Compliance o Notice of Non Compliance depende sa pagrepaso sa ahensya.
Kon nahasubay na sa compliance, ibalik kini sa LGU alang sa pagpanday sa ordinansa nga magsagop sa LTPRP ug i-endorso na dayon sa LTFRB.
Human niini, ang LTFRB na ang maghimo sa dayag ug sihag nga proseso sa pagpili sa mga operators nga nakapasar sa lagda sa panakyanan nga ming-aplay sa nabuksan nga ruta, aron makapagawas na usab sa mga prangkisa sa mga sakyanan nga mobyahe didto.
Kasamtangan nga gipatuman sa LTFRB ang pagisyu sa mga prangkisa sa labing menos 15 ka mga sakyanan nga mosubay sa ruta nga nabuksan, aron pagseguro nga may igo nga makaalagad sa manakayay nga publiko. (PIA-7/Bohol)
