NAGKAHIUSA ang Liga ng mga Barangay-Sevilla Chapter president nga gipangulohan ni Lico-lico Brgy. Capt. Segundina Baluran nga angay morespeto ang lungsod sa Balilihan sa ilaha pinaagi sa paglukat sa gikinahanglang mga permit.
Kini human nipahigayon ang mga kapitan inubanan ni Mayor Juliet Dano sa usa ka briefing sa wala pa ang People’s Forum.
Giinsister sa mga kapitan nga ang Bugwak Spring naa sa Magsaysay, Sevilla ug wala sa Sto. Niño, Balilihan mao man gani nga angayan lamang nga molukat sila sa saktong permit nga gikinahanglan didto sa National Water Resources Board kon NWRB.
Alang kini sa pagkuha sa tubig sa Balilihan didto sa Bugwak Spring nga gamiton sa Bulk Water project sa lungsod.
Naglaraw sila nga magama og Manifesto sa ilang binuwan nga tigum subay sa ilang mga pamahayag.
Giklaro usab ni Mayor Juliet Dano nga wala sila magtinihik sa ilang tubig ug sa kanunay “willing” sila nga “mo-share” niini sa silingang lungsod sa Balilihan.
Dugang pa niya, ang tubig gipanag-iya sa estado.
Sa gipahigayong People’s Forum, gigisa ang mga tinugyanan sa DPWH-1 sa mga katawhan nga nanambong sanglit wala man sila nakatubag sa kadagahan sa pangutana.
Dunay usa gani nga nangutana kon ngano sa mga dialogue nga gipahigayon sa niage, lain-laing mga personahe ang gipadala sa DPWH-1.
“That’s too much for Sevilla!”, pamahayag pa ni kanhi konsehal ug karon Municipal Public Information Officer sa lungsod nga si Jef Ryan Cabagnot. (Kahlil Lester O. Camba)
