UBAY-UBAY nga mga kompaniya ang mipadayag og interes sa pagkuha sa power distribution sa mga lugar nga sakop karon sa Bohol Light Company, Inc. (BLCI) kansang prangkisa gikatakdang ma-expire sa 2025, si Gobernador Aris Aumentado miingon karong bag-o.
Matod ni Aumentado, ang Villar Group, Vivant Renewable Energy Corporation, Mactan Electric Company, Prime Infrastructure Capital Inc. ug Aboitiz Power Corporation nagtinguha nga hulipan ang BLCI, usa ka pribadong gipanag-iya nga kompanya diin ang Probinsiya sa Bohol adunay 30-porsiyento nga stake.
Si Aumentado nitataw nga aduna nay ordinansa ang gihimo sa Sangguniang Panlalawigan (SP) aron masiguro nga ang mga panginahanglanon sa probinsiya matubag sa sunod nga distribution utility nga mo-cater sa mga lugar nga giserbisyuhan karon sa BLCI nga naglakip sa Tagbilaran City.
Ang first-term governor midugang nga ilang unahon ang mga kompanya nga makapahamtang og mas mubu nga bayranan sa kuryente ug andam nga motanyag og dugang bahin sa kagamhanang probinsiyal o mas taas pa sa 30-porsiyento nga stake niini sa BLCI.
Ang kagamhanang probinsiyal nangita usab ug distribution utility (DU) nga mopasalig sa pagpalit sa renewable energy isip nag-unang tinubdan sa kuryente.
Matod ni Aumentado, ang maong pasalig makadani sa renewable energy firms nga magtukod ug power-generation plants sa isla-probinsya uban ang kasiguruhan nga ang ilang produksiyon maoy prayoridad nga tinubdan sa lokal nga DUs.
Si Aumentado miingon nga ang gobyerno mopalabi usab sa mga tanyag gikan sa mga kompaniya nga makahimo sa pag-commit sa pagsulbad sa perennial nga problema sa gitawag nga “spaghetti wires” sa lain-laing bahin sa probinsiya partikular na sa Tagbilaran City.
Sa sayo pa, niduso og ordinansa si SP assistant floor leader Board Member Tomas Abapo, Jr.
Gawas sa mga hinungdan nga gipatungha ni Aumentado, ang gisugyot nga ordinansa nagtinguha usab nga idili ang mga DU sa pagkuha sa ilang gahum gikan sa mga coal-fired power plants.
Gidili usab niini ang mga DU sa pagpataas sa ilang regular nga bayranan sa kuryente sa higayon nga ang ilang orihinal nga mga tinubdan mahimong dili magamit nga mapugos sila sa pagkuha sa suplay gikan sa lokal nga mga planta sa diesel o uban pang mga pasilidad nga makamugna og kuryente.
Ang gisugyot nga lakang ni Abapo gipailawom sa deliberasyon sa lebel sa komite. (RTB)
