GIBUTYAG ni Gob. Aris Aumentado nga gikinahanglan ang mga investments dinhi sa lalawigan nga mao usab ang mahimong tinubdan sa Job generation alang sa mga Bol-anon.
Dunay mga investor na ang nisampit sa kagamhanang probinsyal arun mo- invest sa water supply, energy ug uban pa.
Kahinumduman nga apil kini sa mga development agenda nga giladlad sa gobernador sa bag-ohay pa siya nangalagad isip amahan sa lalawigan.
Dugang pa sa gobernador nga malipay ang mga investors kanila gumikan kay walay gitago ang mga opisyales sa Bohol ug mao man lamang ang interest sa ginsakopan.
Namahayag si Gob. Aumentado nga mopadala siya og suwat ngadto kang Pres. Bongbong Marcos Jr. arun suportahan ang lakang mas ugmaron pa ang panubig sa Bohol pinaagi sa World Bank.
Gihimo ang maong lakang arun masiguro nga dunay igong water supply ang mga mga kalungsuran ilabi na ang mga tourist destination.
Suma pa sa tinubdan, motabang usab ang Department of Tourism nga kasamtangang gipangulohan ni Sec. Christina Garcia-Frasco. Si SeC. Frasco ang kapikas sa kinabuhi ni Deputy Speaker ug Cebu 5th district Cong. Vincent Franco “Duke” Frasco.
Sa laing bahin, nidayeg ang gobernador sa maayong trabaho sa Provincial Motorpool sanglit 2 ka Volvo nga pison na ang naayo.
Sa nangaging panahon, dunay gipalit nga 35 ka mga brand-new heavy equipment apan 10 lamang modagan.
Si kanhi Baclayon Councilor Tertuliano “Bebot” Apale Jr. maoy kasamtangang Exec. Asst. on Motorpool. (Kahlil Lester O.Camba)
