NAMAHAYAG si Gob. Aris Aumentado nga dunay himoon ang Kagamhanang Probinsyal nga Task Force batok mga kolurom nga mga sakyanan lakip na ang mga van-for-hire ug uban pa.
Kini gumikan kay dunay mga niabot nga impormasyon kabahin sa ka-risgo nga nagbyahe ang mga sakyanan nga walay saktong papales ug wala magsunod sa saktong plitehan.
Ang pag-umol sa Task Force gihimo arun awhagon ang mga operators sa maong mga sakyanan sa pagparehistro.
Dugang pa ni Gob. Aumentado nga iyang gitahasan ang mga PPDO arun sa pag-gama sa Road Map Plan nga ilang iduso ug paabrohan sa LTFRB.
Mao usab kini ang basehan sa maong ahensya arun maka-avail ang mga transport groups dinhi sa lalawigan sa Modernization program.
Gikinahanglan nga dunay fare matrix nga sa mga sakyanan nga maoy mahimong basehan kon nagsunod ba sa saktong plitehan o nagpatuyang lang ang uban.
Kahinumduman nga kadaghanan sa mga yanong lungsoranon ang naghangyo nga kon mahimo striktong iimplementar ang road safety sa lalawigan. (Kahlil Lester O. Camba)
