“ANG BALAOD DILI MAKATABANG sa mga tawo nga gikatulgan lamang ang ilang mga katungod,” suma pa sa usa ka panultihon.
Ang balaod gimugna aron makabaton og kahapsay ug kalinaw ang usa ka nasud.
Kini pud ang gamiton aron maangkon ang hustisya sa ni bisan kinsang mabiktima sa mga dautang elemento o gitamakan ang ilang mga tawhanong katungod.
Wala man siguro’y sayop kon atong gisubay o subayon o sundon ang mandato sa matag balaod. Makatarunganon kana.
Daghang mga banggiitang tawo sa katilingban nga maayo kaayo kon balaod ang hisgutan, suma pa, mura’g ila na kining “kinaon.” Hawud na kaayo niining maong butang o aspeto sa kinabuhi.
Apan sa laing nawong niini, daghan usab ang mga tawo nga walay hamong o kahibalo mahitungod sa balaod ilabina kadtong walay edukasyong nakab-ot.
Ug bisan gani kadtong nakatungtong og eskuwelahan, minus gihapon ang nahibaw-an o abilidad ilabina kon walay hilig niini.
Hinuon magdepende kon hilig mobasa o mo-utingkay sa mga probisyones sa matag balaod o mobasa sa 1987 Konstitusyon.
Kahibawo na kitang daan nga moabot gayud ang panahon nga hadla-on kita sa panahon: ang atong prinsipyo ug baruganan.
Apan kon tinud-anay ug bug-os ang atong katuyoan sa pagserbisyo, walay mga panghitabo o sirkumstansiya o mga tawo nga gamhanan nga makababag kanato.
Ug kanang maong pilosopiya maoy akong gipuy-an nga maisugon bisan tuod ingnon ra ko sa uban kaniadto nga, “Estudyante pa gani musukol na’s taas; pobre, ug mura’g si kinsa.”
Daghang mga sakit nga istorya gikan sa atong mga kritiko, kasagaran pa gani mga kaliwat o kadugo ra mismo ang mosaway. Pero ok ra, siguro wala sila makasabot sa mga butang nga atong gibarugan ug gipakigbisugan.
Ang akong mga nasinati ilabina niining hisgutanan sa balaod nga gisukod ang akong prinsipyo, imbes makapapuypoy sa akong abagahan, nahimo hinuon ako nga mas lig-on pa.
Anaay usa ka pamulong nga akong padayong gihuptan karon ug mao kini: “The greater the pain, the stronger we become.”
Nakahatag gayud kini og gamay nga kasakit alang kanako ug dako kaayong kasakit sa akong pamilya ilabina ordinaryo ra kaming mga lumulupyo, walay kaya o igong ikabuga aron mosukol sa ni bisan kinsang nagpanamastamas kanako o kanamo sa butang nga akong gituohan nga sakto ako.
Daghan kitang mga nakailang tawo nga may susama og istorya kanako o kaninyo apan nagpakahilom lamang, pero wala sa akong bokabularyo ang pulong “motahan” kay kahibawo ko sa akong gibuhat, sakto kini.
Atong aghat sa uban, “pahimusli ang balaod” dili sa dautang paagi apan sa sakto ug makatarunganong mga tumong ug tinguha.
Hinumdomi nga ang atong kahuyang maoy kusog sa atong mga kaaway ug kaaway sa estado.
Walay mang-ulipon kon walay magpaka-ulipon. Sukol kon sakto ka; paubos kon sayop ka.
Bisan anaay mga higayon nga makaingon ta nga “bangis” ang balaod, kon wala kita’y kalapasan niini, wala kita’y angay kahadlukan.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
