NAGSUGOD na usab ang Philippine Coast Guard (PCG) sa Bohol sa pagtutok sa ilang pagpatrolya sa mga tourist destination taliwa sa subling pagdagsa sa mga turista sa islang lalawigan.
Matod ni PCG Western Bohol commander Lt. Wenceslao John Wenceslao, ilang gimintinar ang kanunay nga visibility sa mga importanteng lugar sa kadagatan sa probinsya aron mapugngan ang kriminalidad, insurhensiya ug uban pang ilegal nga kalihokan.
Ang gipakusog nga pagpatrolya sa mga destinasyon sa mga turista kabahin sa ilang mandato nga mahatagan ug seguridad ang mga residente ug bisita ug mapanalipdan ang kalikupan sa dagat.
Gipasalig ni Wenceslao nga pabiling “peace” ang kadagatan sa probinsya apan gipadayon gihapon nila ang gipakusog nga patrolya isip “proactive” nga lakang.
Ang PCG Western Bohol ug Eastern Bohol karong bag-o nagpakita kung giunsa ang ilang naandan nga pagpatrolya gihimo sa mga opisyal sa Provincial Disaster Risk Reduction and Management Office ug Bohol Maritime Group sa Philippine National Police ug mga miyembro sa media.
Ang PCG Bohol sa pagkakaron adunay 160 ka mga personnel ug ang western command sa ahensya adunay lima ka aluminum boat, duha ka jet ski, ug usa ka rubber boat. (RTB)
