Ni Wilson Auguis Subrio
NAKADAWAT og P195,000 nga financial assistance ang mga naapektuhan sa sunog sa lungsod sa Trinidad kaniadtong Mayo 15 atol sa pista.
Kini ang gipaambit ni Gobernador Aris Aumentado sa social media.
“Nalipay ako sa atong aktibo nga pagresponde ngadto sa mga naapektuhan sa sunog didto sa Trinidad niadtong Mayo 15, 2023,” matud ni Gob. Aumentado.
Sa pagpanguna ni Ms. Mita Tecson, ang atong Head sa Office of the Provincial Social Welfare and Development (OPSWD), EA Jun Flores, ug Trinidad Vice Mayor Fernando Erio, giapud-apod kaniadtong Mayo 31, 2023 sa Conference Room sa Munisipyo sa Trinidad ang mga bugas ug de lata ngadto sa 42 ka mga biktima sa sunog.
Gihatagan usab ang mga fire victims og mga banig, malong, habol, moskitero, tuwalya, sabon, toothbrush ug uban pa nga kinahanglanon.
Ang maong mga apektado sa sunog nakadawat usab og financial assistance nga nagkantidad ug P195,000- diin 9 ang nakadawat ug tag P10,000, 3 ang nakadawat ug tag P5,000, ug adunay 30 ka mga biktima nga tag P3,000 ang nadawat kay sumala kini sa kadaot diha kanila sa maong sunog, nga sibo sa pondo.
“Nagapasalamat ako sa Labawng Makagagahom sa resiliency sa mga Bol-anon,” matud sa gobernador.
