SA tanan nga mga napili nga tag-as nga opisyal sa Bohol, si Kongresista Alexie Tutor ang nakapupo sa labing taas nga net satisfaction rating gikan sa katawhan nga gialagaran, segun sa Bohol Poll nga gipadagan sa Holy Name University Center for Research and Publications niadtong Abril 29 ngadto sa Mayo 21 niining tuiga.
Si Kongresista Alexie Tutor nakakuha na sa 30 puntos nga pag-uswag sa pagkakontento sa mga katawhan sa iyang distrito sa pagpangalagad sa babaye nga Kongresista, gikan sa iyang +56 net satisfaction rating niadtong Pebrero ngadto sa Mayo 2022, o sa wala pa ang piniliay sa Mayo.
Sa Bohol Poll, didto sa Public Presentation sa resulta sa survey, gibutyag ni Maria Paz Espiritu, ang Project Director sa polling nga buot magpadayag sa pulso sa katawhan, nga sa Abril ngadto sa Mayor niining tuiga, anaa na sa +86 ang nakuha nga net satisfaction rating sa babaye nga Kongresista.
Gani, gihatagan si Kong Tutor sa +86 net satisfaction rating sa kinatibuk-an nga mga respondents nga naa nanimuyo sa mga hilit nga lugar (rural) kon intandi sa +80 nga gihatag sa mga anaa sa mga sawang o urban areas.
Ang +86 ni Kongresista Tutor, katumbas na sa excellent satisfaction rating, segun sa mga social weather survey terminologies.
+84 usab ang net satisfaction rating sa kongresista sa mga anaa sa Class ABC o kadtong mga giisip nga kwartahan ngadto sa medyo arangan, +84 sa mga anaa sa middle class apan gihatagan sa excellent rating si Tutor sa +100 sa mga taga Class E, ug sa mga nag-edad og 18-24.
Sunod ni Kongresista Tutor nga may ta-as nga net satisfaction rating si City mayor Jane Yap nga nakakuha sa +79 net satisfaction rating.
Miabut sa 81% ang kontento sa performance sa babaye nga mayor samtang 2% lamang ang wala matagbaw sa serbisyo sa batan-ong labing unang babaye nga mayor sa Tagbilaran.
Ang +79 net satisfaction rating ni Mayor Yap, excellent pa gihapon, segun sa SWS.
Labing sikat si Mayor Jane sa mga batan-ong nag-edad og 25-34, kinsa mihatag kaniya og +94 net satisfaction gisundad sa 35-44 nga panuigon nga mihatag og +88.
+100 ang nakuhang satisfaction rating sa babaye nga mayor gikan sa mga urban poor, +83 sa Class ABC ug +77 sa middle class respondents.
Ikatulo sa mga lokal nga napili nga opisyal nga may tag-as og net satisfaction rating mao si Gob Erico Aristotle Aumentado nga miani og +78.
79% sa mga survey respondents ang kampante sa performance sa goberandor, usa lamang ka porsyento sa mga respondents ang wala makontento, nga miresulta sa +78 net rating.
Kini nga rating katumbas pa gihapon sa excellent.
Ika upat si Bise Gobernador Victor Dionisio Balite na may nakuha nga net satisfaction rating nga +65: 70& sa mga respondents natagbaw sa serbisyo ni Balite samtang 5 ka porsyento ang wala makontento sa performance sa anak sa kanhi Bise Gobernador.
Ika lima sa may tag-as nbga net satisfaction rating si Kongresista Edgar Chatto nga may +64 dala sa +66 nga nakontento kuhaan sa 2% nga wala matagbaw sa serbisyo sa kongresista sa unang distrito.
Gikan sa +69% net satisfaction rating sa Febrero ngadto sa Mayo 2022, mikanaug og 5 puntos ang rating ni Kongresista Chatto karon apan katumbas pa gihapon kini sa very good.
Mas taas ang pagsalig sa Kongresista sa mga tawo nga halayo sa syudad, +74 kay sa +46 lamang sa urban, labing sikat sa Class E sa +76 ug sa Class ABC nga may +75.
Ika unom si Kongresista Vanessa Aumentado nga mi-ani sa +62 dala sa +66% nga natagbaw sa iyang serbisyo apan may 3% usab nga wala makontento sa serbisyo sa bag-ong kongresista.
Mas maayo ang pagtan-aw sa mga taga urban ni Kongresista Aumentado nga mihatag og 70% kon itandi sa +62 lamang sa rural communities.
Ikapito na si City Vice Mayor Adam Jala nga nakakuha og +61%.
+64 ang rating sa bise mayor sa syudad sa mga natagbaw sa iyang buhat samtang may 3% usab ang wala matagbaw sa bise mayor.
+66 ang grado nga gihatag sa Bise Mayor gikan sa Class ACBC ug + 61 ang net satisfaction sa Class D, apan undecided ang 100% sa gibuhat ni Bise Mayor Jala sa Class E respondents.
Ang survey mikuha sa tubag sa 400 ka samples nga tanan botante sa Bohol, tag 100 gikan sa matag distrito, samtang may 100 usab ka respondents ang gikuha gikan sa Tagbilaran.
Alang sa kinatibuk-ang Bohol, natala ang margin of error sa +/-5% samtang ang Tagbilaran City,District 2 ug District 3 anaa sa +/-10 ug ang kinatibuk-ang District 1, ang margin of error, anaa sa +/-7%. (PIAbohol)
