ADUNAY 16 ka barangay sa Lungsod sa Ubay ang nakadawat, Hunyo 1, 2023, sa hinabang nga tag P10,000 alang sa totally damaged nga panimalay sa nakalabay nga bagyong Odette. Nagpadayon taman hapon ang Distribution of Emergency Housing Assistance Program (EHAP) for Calamity Victims gikan sa pakigtambayayong sa National Government-National Housing Authority (NHA), Provincial Government pinaagi ni Gov. Aris Aumentado ug sa mga hingtungdang Local Government Units (LGUs).
Ang maong mga recipient barangays, mao ang Buenavista, Guintabo-an, Sinandigan, Tubog, Tuboran, Villa Teresita, Bood, Camambugan, Casate, Poblacion, Tapon, Calanggaman, Katarungan, Tipolo, Union ug Camali-an.
Nikabat sa kantidad P22,500,000 ang kantidad sa naapud-apod gahapong adlawa ngadto sa 2,250 ka mga benepisyaryo, ning ika-tulo nga batch sa second tranche sa EHAP Distribution.
Gipahigayon kini sa Pres. Ramon Magsaysay Gymnasium, Poblacion Ubay, diin gitambungan ni Mayor Constantino Reyes, Vice Governor Dionisio Victor Balite ug Engr. Ronilita Bunado, Provincial Planning and Development Office (PPDO) – Shelter Cluster Focal Person.
Si Vice Governor Balite sa iyang mensahe nidasig sa katawhan nga magpadayon sa pagtinabangay aron mo-uswag, kay bisan dugay, apan moabot gayud ang tabang gikan sa pangagamhanan. Ang Bise Gobernador nihulip kang Gobernador Aris nga kasamtangang nitambong sa importante nga kalihukan.
Si Kapitana Procisa Genita sa Barangay Buenavista, nagpasalamat sa administrasyong Abante Bohol gumikan kay gipangitaan gayud og paagi sa pangagamhanan nga matubag ang gilauman nga tabang.
Ang tibuok kalihukan ubos sa pagbantay sa pwersa gikan sa Task Force Bohol pinanguluhan ni CPL Reymar Deasis, Team Leader sa Task Force Bohol 302nd Brigade, ug sa Ubay Municipal Police Station pinanguluhan ni COP PMAJ Romar Labasbas. (Wilson Auguis Subrio with reports PIMO/ALT)
