Ni Wilson Auguis Subrio
NIGAHIN og P200,000 ang Kagamhanang Probinsyal sa Bohol (PGBh) alang sa pagpalambo sa duha ka unit nga Child Development Center sa Barangay Buenavista, lungsod sa Carmen nga giduaw ni Gobernador Aris Aumentado, Hunyo 3, 2023.
Mao kini ang gipaambit sa gobernador sa social media.
“Bisan pa man og Sabado, padayon gihapon kita sa paghatag og serbisyo ngadto sa mga kalungsuran. Usa sa atong mga gibisita mao ang Barangay Buenavista sa Carmen, nga gipanguluhan ni Barangay Captain Ireneo Oro,” matud ni Gob. Aumentado.
“Sa maong pagduaw, gitunol nato ang P200,000 nga ayuda alang sa pagpalambo sa duha ka unit nga Children Development Center. Gikan kini sa buhatan ni Board Member Nathaniel Binlod,” dugang ni Aris.
Gipahinumduman ni Gob. Aris nga i-liquidate dayon kini aron makadawat pa sila sa ubang ayuda sa Kagamhanang Probinsyal.
“Gipahigayon usab sa maong barangay ang pagdistribute sa mga honorarium alang sa mga 265 ka mga Barangay Health Workers (BHWs) sa Carmen, na girepresentahan sa 29 ka mga BHW Presidents sa matag barangay. Pasalamat kini alang sa paghatag og serbisyo ngadto sa mga komunidad na ilang gi-alagaran,” panapos ni Gob. Aris.
