MATUD pa sa sikat nga panultihon, “Try and try until you succeed.”
Motuo ko sa maong panultihon ilabina daghang parte sa atong kinabuhi nga napakyas kita. Napildi.
Daghan kanato dali ra’ng mohural sa mga pagsulay sa kinabuhi. Dali ra’ng malusno kon madam-ag.
Sayod kita nga dili lalim nga mapakyas sa atong mga tinguha o pangandoy sa kinabuhi.
Pero anaay giingon nga “Ang pinakasakit nga kapildihan mao ang dili pagsuway nga magmadaugon sa lumba sa kinabuhi.”
Ang dalan paingon sa kalampusan dili sayon. Ana-a ang daghang libaong nga maagian.
Matud pa ni Sir Johnny, akong agalon sa BBDN ug Bohol News Today (BNT), “Ayaw kabalaka kay GIPAHILUNA NA ANG TANAN.”
Pasabot, taas nga pasensya ang gikinahanglan aron kita magmalampuson sa atong mga damgo.
Kinahanglan pursigido kita sa matag problema nga ato ra kanang madaug.
Ug siyempre, magtakin kita kanunay og positibong panghunahuna kay diha makahubot kita og kadasig ug kusog.
Sa akong paminaw, maayo ang dagan sa ekonomiya sa Bohol ug sa Pilipinas karong tuiga.
Ana-a usab ang akong pagsalig nga mopabor ang panahon sa akong kaugalingon.
Akong nakita nga anaay maayong opportunidad nga moabot. Ug kon akua na kanang makuptan, dili na gayud buhian.
Ang ligid sa kapalaran, matud pa, usahay ana-a sa ubos ug ana-a sa taas, pasabot, puli-puli ra.
Kini nagpasabot nga dili sa tanang panahon ana-a kita sa kalisdanan.
Sa pagka-karon, dili ikalimod nga daghan kanato nga ana-a sa kalisdanan.
Ang uban hinuon kanato, wala kaayo naglisod ilabina kadtong nakaplastada na og ayo sa ilang pamuyo. Arangan.
Basta ayaw lang paluya-luya diha. Moabot ra ang oras nga imong makab-ot ang hayag nga kalampusan sa kinabuhi.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
