MOHANGYO ngadto ni Gob. Aris Aumentado ang usa sa mga consultant sa OGAR nga si Atty Jordan M. Pizarras, kon mahimo mabutangan og buhatan dinhi sa Bohol ang Dept. of Housing and Adjuducation Commission.
Kanhiay kini naila nga Housing and Land Use Regulatory Board (HLURB).
Mao kini ang nakita nga usa sa mga solusyon ni Atty. Pizarras alang sa mga na-scam nga sa mga kadudahang mga “real estate people”.
Grabe ang gasto ug kahago nga mahiaguman sa usa ka tawo nga na-scam. Dili mominus P5,000 ang gasto niini paingon sa Cebu kon motambong sa mga hearing; walay labot pa niini ang mga “appearance fee” sa ilang abogado.
Kahinumduman nga sa mga nangaging mga katuigan, nagkalisod ang mga Bol-anon sa pag-gukod sa mga “scammer” o bisan pa sa pagkuha man lamang sa refund.
Kon mabutangan na og buhatan ang HSAC sa Bohol, mahimo na nga magdawat ug mag-adjudicate .
Ang ugat sa tanan mao ang pre-selling scam nga wala maglukat sa mga gikinahanglan nga permit.
Suma pa sa report sa Inquirer, nibutyag ang HLURB nga 85% sa mga kaso nga gisang-at sa ilaha niadtong 2009 mao ang mga katawhan nga magpa-refund sa ilang gi-downpayment sa pre-selling projects.
Sa pre-selling stage, ang mga developer aghihon ang mga “potential buyers” pinaagi sa ubos nga presyo ug uban pang mga incentives. Mosunod niini ang pagbayad sa downpayment ug ang “monthly equity”.
Magkaproblema na kon nagkaduol na ang turnover date gumikan kay dili pa kompleto ang maong unit nga moresulta sa pag-extend niini. Moabot na hinoon sa higayon nga “mo-giveup” ang buyer. (Kahlil Lester O. Camba)
