UPAT ka Boholano Overseas Filipino Workers (OFW) ang gipapauli gikan sa Sudan nga naapektuhan sa panagbangi, sumala sa usa ka opisyal sa probinsiya.
Si Jessica Calimbayan, ang repatriation officer sa provincial government, niingon nga tulo sa mga OFW ang niabot sa Bohol niadtong Sabado sa miaging semana ug ang usa didto na sa Manila ug gikatakdang ibiyahe sa probinsiya.
Sila mao si Melinda Budiongan, usa ka nurse nga taga lungsod sa Catigbian; Marlon Corsiga, usa ka gas station maintenance worker nga taga Tubigon; Jomar Gingo, usa ka machine operator nga taga Balilihan; ug Evelyn Salado, usa ka household worker, ang lakip sa gipapauli sa nasudnong kagamhanan pinaagi sa Overseas Worker Welfare Administration (OWWA) ug Department of Migrant Workers (DMW).
Samtang matod pa ni Vilma Yorong, hepe sa Bohol Employment and Placement Officer, ang mga OFWs gihatagan og hinabang pinansyal sa OWWA ug DMW.
“Ang amoa lang is ma ensure nga madawat gyud nila tong ilahang assistance from the OWWA and DMW and amoa silang gi-inform sa mga programs and services sa OWWA nga pwede dili ma avail, para nila, sa ilang mga pamilya like mga scholarships,” matud pa ni Yorong.
Ang tulo ka mga OFW nga naabot sa Bohol nakigtagbo kang Gobernador Aris Aumentado sa Kapitolyo sa Tagbilaran City niadtong Lunes aron hisgotan ang posibleng hinabang sa mga migranteng mamumuo kung makadesisyon sila nga mo-abroad.
Gipaambit usab sa mga migranteng mamumuo ngadto sa gobernador ang ilang kahimtang sa gawas sa nasud.
Ilang namatikdan nga dugay na nga nagpadayon ang panagbangi sa Sudan apan bag-o lang misamot ang panagsangka hinungdan nga nahadlok sila sa ilang kinabuhi tungod sa pagpanglungkab sa mga balay sa ilang lugar.
Apan, namatikdan ni Yorong nga ang mga OFW gusto pa nga mobalik sa gawas sa nasud.
Pinaagi sa BEPO, ang mga OFW nakigtagbo sa usa ka recruitment agency alang sa posibleng pagkuha sa usa ka amo sa New Zealand.
Ang Gobyerno sa Philipping nagpabalik sa mga Pilipino gikan sa Sudan sukad sa sayong bahin niining bulana human ang mga panagsangka tali sa magkaatbang nga paksyon sa gobyerno militar sa nasud sa Africa mibuto kaniadtong Abril 15, 2023.
Sumala sa World Health Organization, labing menos 413 ka mga tawo ang namatay ug 3,551 ang nasamdan sukad sa grabeng panagsangka. (RTB)
