DILI kalikayan nga mangitag maduol ug masangpit. Sa panahon sa kalisud ug panginahanglan ang usa ka tawo mahimong malumos sa gipas-an nga problema.. Kasagaran sa atong mga silingan dili ra usab nato iglain. Matud pa, maoy madalidali. Dili lamang kalabot sa panginahanglan nga moduwa kining giingon nga panultihon. Apil usab niini ang atong pagtagad sa usa ka tawo. Kon tandi-on ang kabug-aton sa atong pagtagad ug pagsalig sa isigkatawo, dili ba mas gaan ang atong buot sa paryente kay sa walay labot? Sama ra usab nga mas dali kitang mohatag ug mopahuwam sa mga. kadugo. Matud sa atong mga nahinabi, mas bug-at ang atong pagsalig ug pagtagad ngadto sa mga kaila.
Daghang higayon sa atong kinabuhi nga mas mosalig kita sa atong suod nga higala. Adunay panahon nga dili na kita motoo sa atong mga paryente tungod kay nag-apas lamang sila sa ilang makuha gikan kanato. Kana bang ila lamang gigamit ang pagkakadugo ilabi na panahon sa kalisod ug panginahanglan. Kasagaran sa mga paryente kusog kaayo manghulam nga dili mobayad. Mas dali pa nilang bayran ang ilang silingan kay sa ig-agaw, bisan gani igsuon. Matud pa gasalig. Mao kini ang kasagaran natong mabati nga mga reklamo sa mga katawhan batok sa ilang mga kadugo. Hinuon mag-agad usab kini sa kinaiya ug pagkamatinud-anon sa usa ka tawo.
Apan matud pa, mas bug-at pa ang dugo kay sa tubig. Kini nga panultihon naglambigit sa katali-an sa mga kadugo ug mga paryente. Ang buot ipasabot niini mao nga mas duol ang mga kadugo sa atong dughan. Mas bug-at ang atong mga ig-agaw ug kaliwat kay sa walay labot. Alang sa kadaghanan mas mosalig sila sa ilang mga igso-on ug ig-agaw kay sa niadtong dili nila kaliwat. Naghatag kini ug gibug-aton sa atong pagsalig sa isigkatawo. Naglangkob usab kini mahitungod sa mga pabor, mga hinabang ug uban pa. Nagpasabot kini ug mas suod nga katali-an sa managsuon, ig-agaw, kaliwat ug paryente. Sa kalihokang politikanhon, makita ang panagsandurot sa mga kaliwat ilabi na panahon sa pinili-ay.
Mas bug-at ang dugo kay sa tubig tungod sa katali-an. Mas duol kanato ang kadugo kon itandi sa uban tungod sa pagkakaila. Mas suhito kita sa atong mga kaliwat kay sa uban. Ang kinaiya ug batasan sa tawo mahimong ibasi sa atong pagkasuod. Daghang higayon nga mas suod pa kanato ang dili kadugo. Gani dili tanan natong suod nga higala atong kaliwat. Hinuon lisod gayud mangita ug tinuod nga higala. Panahon sa panginahanglan, maoy madalidali ang mga silingan, paryente man ug dili. Apan wala kini nagpasabot nga sila atong suod ug tinuod nga higala. Mahimong mas suod nimo ang walay labot labaw pa sa kadugo.
