SUBLING mipa-himangno ang mga tagdumala sa BOHECO 1 ug 2 ug Bohol Light Company Incorporated (BLCI) sa mga kabataan ug ginikanan sa pagdili sa pagpalupad og mga tabanog duol sa ilang mga power lines ilabi na karon sa panahon sa ting-init.
Matud pa sa tolo ka mga power utilities nga lingaw ang pagpalupad sa tabanog sa ingon niining panahon apan ilang giklaro nga sila wala magpugong niini.
Sigon pa nga ila lang ipahimangno ang risgo sa pagpalupad sa tabanog duol sa mga power line.
Sumala pa nga ang pagpalupad sa mga tabanog duol sa linya sa kuryente dako og kahigayonan nga maoy hinungdan nga adunay makuryentihan ug makamugna og ‘power interruptions’ ilabi na kun maigo ang overhead wires.
Sigon pa sa Distribution Services Department (DSD) sa tolo ka mga power utilities, nga nakatala sila og 30-kapin ka power interruptions sa mga nagkadaiyang franchise area tungod sa tabanog nga miigo sa power lines sa nakalabay nga tuig.
Dugang pa nga ang pagpalupad sa tabanog kinahanglan buhaton sa dakong hawanan ug layo sa overhead power lines, substations ug ubang electrical installations.
Lain nilang pahimangno nga dili mokatkat o mokuha sa mga tabanog nga nasabod sa overhead power lines ug dili mosuway pagsulod sa mga substation. (RTB)
