SUBSOB nga kampanya ang gihimo karon sa Department of Health Region-7 aron makab-ot ang target nila nga 90 percent sa mga bata nga ma-fully immunized. Kini nagpasabot nga mabakunahan ang mga bata batok sa tipdas, Rubella ug polio.
Nasayran ang bakuna batok tipdas ihatag sa mga bata nga siyam hangtud na sa 59 ka buwan samtang ang bakuna batok polio ihatag sa mga bata 0 hangtud sa 59 ka buwan.
Si Dr. Jaime Bernadas, Regional Director sa Department of Health Central Visayas nagkanayon nga sa 90 percent nga target nila naa pa lang sila sa 42 percent hinungdan nga nagmugna siya og catch up immunization diha sa mga Barangay Health Centers.
Gihulagway ni Dr. Bernadas nga gikinahanglan gyud nga makuha ang target aron malikayan ang epidemic sa measles sanglit maghatag kini og komplikasyon sa mga bata nga maigo sa maong sakit.
Gitug-an ni Bernadas nga ang gobyerno migasto gyud alang sa bakuna kontra tipdas, rubella ug polio.
Nasayran nga ang ubang ahensiya sa gobyerno sama sa Department of Interior and Local Government (DILG) nitabang na sa kampanya sa DOH pinaagi sa pagpagawas og kamanduan sa mga Local Government Units aron makab-ot gyud ang ilang tinguha nga population sa mga bata nga fully immunized. (RTB)
