GISUGYOT sa ikaduhang labing-labaw nga opisyal sa Bohol ngadto sa Provincial Agriculture Office (PAO) nga moumol og alternatibong livestock program alang sa mga hog raisers nga maapektohan unya sa ASF.
Gipadayag ni Bise-gobernador Dionisio Victor A. Balite, Ph.D nga labing maayo nga mangita og laing option sa pagpamuhi og hayop diin pipila sa mga alternatibong pamaagi mao ang pagbuhi og kanding, manok ug rabbit.
Nagkanayon ang bise-gobernador nga posibleng idugang kini nga option sa Livestock, Poultry, ug Fishery Dispersal Program sa lalawigan sa Bohol.
Base sa nakuha ni Balite nga taho sa PAO dunay dili mominos 10,000 ka hog raisers ang lalawigan ug nabalaka gyud kini sa hulga sa ASF.
“Naa kanunay ang kabalaka sa atong mga hog raisers ang hulga sa ASF labi na kadtong ginagmay ang pagpamuhi og baboy. These are small-scale hog raisers,” matud pa ni Balite.
Dugang pa sa opisyal nga ang panginabuhi sa hog raisers maoy gisaligan sa pagpa-eskwela sa ilang anak.
“Gihulagway gani sa uban nga ang pagpamuhi og baboy usa ka ‘alkansiyang buslot’ tungod kay usahay adunay gamayng ginansya, usahay tabla, ug adunay higayon nga alkansi ang atong mga hog raisers,” dugang sa bise-gobernador.
Si Balite maoy chairman sa committee on agriculture sa Sangguniang Panlalawigan (SP) ug base sa iyang panukidoki kapin sa usa ka bilyon ka pesos sud sa usa ka tuig ang mawagtang sa hog raisers kon simbako maigo og ASF ang mga barangay sa tibuok lalawigan sa Bohol. (RTB)
