SUBLING nanawagan ang hepe sa Provincial Health Office (PHO) sa Bohol nga si Dr. Reymoses Cabagnot, sa mga senior citizens nga magpabakuna batok sa COVID-19.
Matud pa ni Cabagnot, angayan gayud magpabakuna tungod kay dali ra kaayo para sa mga tiguwang ang matakboyan sa mga sakit.
Namatikdan sa opisyal sa pagkakaron ilabi na panahon sa ting-init ang pagtumaw sa mga sakit sama sa ubo, sip-on ug hilanat ug naa pa gihapon ang COVID-19.
Gitug-an ni Cabagnot nga ang buhatan sa DOH-PHO adunay daghang bakuna gikan sa Sinovac, Pfizer ug uban pa ug dili angay mabalaka ang mga senior citizen tungod kay luwas na kini human pipila na ka milyon ang nabakunahan.
Gidasig sa opisyal ang katawhan ilabi na ang mga senior sa pagpabakuna gikan sa first dose hangtud na sa ikaduha ug ingon man sa booster shot aron adunay proteksyon sa COVID-19. (RTB)
