DI MOMINOS sa 40 ka mga business establishment sa Bohol ang nasuta nga delingkwente sa remittance sa social security contributions sa ilang mga empleyado. Kini nahibaw-an homan gibisita sa mga personahi sa Social Security System (SSS) ang mga negosyante aron awhagon sila sa pag-areglo sa ilang mga kuwang nga remittances.
Matod ni Alieta Basubas, tagdumala sa SSS Bohol, ang mga operasyon gihimo sa Tagbilaran City ug mga lungsod sa Dauis, Panglao, Tubigon, ug Calape isip kabahin sa nationwide Run After Contribution Evaders (RACE) campaign sa ahensya.
Ang 40 ka mga establisemento nga wala’y kontribusyon mikabat sa “milyones ka pesos” ug nakaapekto sa gibanabana nga 1,000 ka mga indibidwal.
Bisan pa, adunay daghang mga employer sa tibook probinsya nga napakyas sa pag-remit sa mga kontribusyon sa SSS sa ilang mga empleyado apan wala gipaubos sa mga pagbisita sa RACE.
Ang mga gibisita sa SSS naglakip lang sa nag-unang walo ka mga delingkwente sa kontribusyon nga adunay labing daghang apektadong mga empleyado sa lima ka lokalidad nga sakop sa operasyon sa ahensya sa pagkakaron.
Si Basubas niingon nga ang nag-unang delingkuwente nga kompanya adunay 130 ka mga indibidwal, samtang ang uban nag-average og 20 ka mga empleyado matag usa.
Ang mga employer nga mapakyas sa pagtuman sa katapusang gipangayo sa ahensya alang sa remittance, mapailalom man sa RACE visitations o dili, mag-atubang og kasong kriminal tungod sa paglapas sa Republic Act No. 11199, o nailhan nga Social Security Act of 2018.
Ubos sa balaod, ang mga makonbikto nga makalapas pahamtangan og multa nga P5,000 ngadto sa P20,000 o pagkabilanggo sa unom ka tuig og usa ka adlaw ngadto sa 12 ka tuig.
Matod ni Basubas, gigukod usab sa ahensya ang mga establisemento nga wala pa marehistro ang ilang mga empleyado sa SSS.
Dugang ni Basubas nga ang SSS mopahigayon na usab ug RACE operations sa probinsiya gikan sa Hulyo hangtod Agosto.
Ang ahensiya motutok sa Tagbilaran City, partikular na sa mga establisemento nga wala pa marehistro ang ilang mga empleyado sa SSS. (RTB)
