TAGBILARAN CITY, Bohol, April 27, (PIA)–Mipahinumdom ang Obispo sa Tagbilaran ngadto sa mga magtutuo, sa kakunay nga paghinumdom nga ang piyesta adunay relehiyosong aspeto nga dili mahimong ipahimulag sa mga kasaulogan.
Sa usa ka suwat pastoral nga gipagawas niadtong Abril 25, 2023, si Obispo Alberto Uy, DD, agi og paggiya sa mga magtutuo samtang nagsingabut na ang mga kapistahan sa Bohol, gipalubad sa labing taas nga opisyal sa simbahang katoliko sa Diyosesis sa Tagbilaran ang iyang mga namatikdan ug pangindahay aron mahibalik sa piyesta ang matuod nga tumong niini.
“Ang piyesta gisaulog aron pagpalanog sa katilingban nga matuohon sa ilang pasalamat ug pagdayeg sa Ginoo sa tanang grasya ug panalangin nga nadawat ilabi na kadtong gipaagi sa balaang patron,” niya pa sa Obispo.
Gipasabut niya nga ang piyesta nahimo nang aspeto sa kultura ug katilingbanong kinabuhi (socio-cultural celebration), kini nagpabilin, una ug labaw sa tanan, nga usa ka kasaulogan nga relihiyoso (religious festival).
Apan, namatikdan na sa simbahan nga niining ulahing mga tuig, sa lain-laing mga dapit dinhi sa Diyosesis ug sa probinsiya, may mga nightly activities sa mga nobenaryo nga hinay-hinay nang mitalikod sa naandang sukdanan sa disente nga kalingawan.
“Naobserbahan nga adunay mga pasundayag diin sayon kaayo nga gibuhian ang law-ay nga mga pulong ug lihok,” dugang niya didto sa pastoral letter.
Gawas pa niana natumbok usab sa Obispo sa Tagbilaran ang kawalay-regulasyon sa kakusog sa sound systems panahon sa mga kalingawan, nga bisan kon makalingaw kini sa pipila, angay ipangutana kung ang mga pasundayag nga sama niini nakatampo ba sa positibo nga paagi sa paglambo sa kulturang Bol-anon ug pagtubo sa espirituhanong kinabuhi.
Gihatagag pagduot ni Bishop Uy nga ang ang aspetong relihiyoso sa piyesta usa ka elemento sa kasaulogan nga dili mahimong tangtangon; kay mausab niini ang kinaiya ug kalidad sa maong selebrasyon.
Isip magbalantay sa mga karnero sa panon sa Diyos, matud ni Obispo Uy nga, mas angay ug mas ikalipay unta nga ang mga pasundayag nga makalingaw sa mga tawo, ug magpahinumdom sa mga hiyas nga Kristohanon, ilabi na kadtong mga hiyas nga gipuy-an sa patron nga gipasidunggan.
Niini, gipadayag niya nga “Uban sa pagsalig sa maayong kabubut-on sa katawhang Bol-anon, ako nagahangyo sa tanan nga atong panalipdan ang kasagrado sa piyesta nga nahimo nang tipik sa atong kinabuhi.”
Dugang pa, naghimo og lina-in nga panawagan ang Obispo sa Tagbilaran ngadto sa nga opisyales sa kagamhanan.
“Unta magtinabangay kita aron masiguro nga sibo ang mga ipasiugdang kalihokan sa kinaiya sa atong selebrasyon,” matud pa sa Obispo.
Ug niini, iyang gipasalig ang mainitong kooperasyon sa simbahan alang sa pagkab-ot sa nasampit nga katuyuan. (PIA-7/Bohol)
