NIPASAR ang Sangguniang Panlalawigan (SP) og ordinansa nga naghatag og P5,000 nga financial assistance sa mga pamilya sa mga nangamatay.
Ang maong lakang gitawag nga “Bereavement Assistance Program of Bohol,” napasar sa ikatulo ug katapusang pagbasa atol sa regular session sa SP niadtong Martes, Abril 25, 2023.
Base sa ordinansa nga gipangamahanan ni BM Nanay Lucile Yap-Lagunay, ang surviving heir o usa ka indibidwal nga nag-atiman sa namatay maoy makadawat sa benepisyo.
Nalatid sa maong ordinansa nga kinahanglang pamatud-an nga ang namatay ug benepisyaryo mga residente sa Bohol.
Kinahanglang magpakita ang mga claimant og valid ID sa namatay ug sa benepisyaryo, death certificate, ug pruweba sa relasyon sa namatay.
Bisan pa, ang nahabilin nga pamilya o ang nag-atiman sa namatay kinahanglan nga mu-file sulod sa kwarenta (40) ka adlaw gikan sa pagkamatay.
Sumala sa ordinansa, ang lalawigan sa Bohol nigahin og P15 milyones alang sa pagpatuman sa programa karong tuiga.
Sa sayo pa, si Gobernador Aris Aumentado niisyu sa Executive Order (EO) No. 10-A, o mas nailhan nga “Bereavement Assistance Program.” Ang ordinansa gituyo aron mapalig-on ang maong EO. (RTB)
