NASAKMIT ang 7.1-M balor sa gituohang shabu sakmit sa usa ka buy bust operation didto Panglao diin si Panglao Mayor Boy Arcay nisaksi sa malampusong operation karong bag-o.
Si PMaj. Andie Corpus, chief of police sa Panglao Municipal Police Station ni-ila sa suspect nga si Matt Darnel Abuyabor, 27, ulitawo, residente sa Purok 4, Poblacion 1, Tagbilaran City.
Nadakpan ang suspect sa gihimong buy bust operation sa Panglao MPS Drug Enforcement Team pinangulohan ni PMaj. Corpus ug ang Provincial Intelligence Unit pinangulohan ni PLt. Col. Jomar Pomarejos.
Nasakmit gikan sa suspect ang usa ka medium size sachet sulod ang gituohang shabu nga maoy subject sa buy bust, P1,000 buy bust money ug P74,000 budol money.
Samtang, nakuha gikan sa iyang possesion ang walo ka large sachet sulod ang gituohang shabu, usa ka box gisudlan sa gituohang shabu, usa ka cellphone ug usa ka back pack.
Gibana-banang anaa sa 1,050 grams ang nasakmit nga gituohang shabu ug dunay standard drug price nga P7,140,000.00.
Gisaksihan ang pag inventory Kag. Francis Gatase, Kap. Basilides Balo sa barangay Tangnan ug nisaksi sa kalamposan sa buy bust operation sa Panglao police si Panglao Mayor Edgardo ‘Boy’ Arcay.
Matod ni PMajor Corpus nga ang suspect gi-ilang Regional High Value Individual (RHVI) sa drug list sa PNP.
Gibilanggo karon ang suspect sa Panglao MPS samtamg ang ebidensiya gisumiter ngadto sa Bohol PNP Crime Laboratory para sa examination.
Dugang ni PMaj. Corpus nga gikatakdang pasakaan ang suspect nga si Matt Darnel Abuyabor og kasong violation of section 5 ug section 11, article 2 sa R.A. 9165 o ang Comprehensive Dangerous Drugs Act of 2022.
Dugang pa niya nga kini maoy pinakadakong drug haul nga nasakmit sa Panglao Police sa ilang anti-illegal drug operation sa ilang lungsod. (RTB)
