TAGBILARAN CITY, Bohol, April 26, (PIA) – Sa tinabangay ug inabagay sa matag usa, papakita sa Inabanga nga kaya diay himoon ang pagpadaghan sa pagkaon pinaagi sa pagpananum.
Gani, didto sa Utanon Summit nga nahitabo sa miaging Sabado, Abril 22, nanghakotang 16 ka kabarangayan sa Inabanga sa mga utanon nga ilang napabuhi aron dalhon ngadto sa lungsod alang sa panapos nga tinabangay nga kalihukan sa 9 ka buwan nga Advancement for Rural Kids (ARK) uban sa abag sa Kagamhanan sa lungsod pinaagi ni Mayor Jose Jono Jumamoy.
Napamatud-an sa usa ka survey niadtong Septembre 2020, nga 1 sa matag 5 ka Pilipino ang gutom human sa pandemic: ang mga lockdowns nagpagapos sa mga mag-uuma ug mangingisda sa ilang mga balay, walay kita nga ilang magamit aron mabuhi.
Niini, daghan ang nahadlok nga mas daghan pang patyon ang kagutom kay sa natakdan sa COVID.
Agi’g patubag niini, nagtinabangay ang mga kahugpungan ug mga kagamhanan aron ipatuman ang Feed-back: us aka programa nga modagan sa 8 ka semana, nga magpasugod usab sa binayloag og mga utanon, aron lamang may makaon.
Ang mga kahugpungan mopili og usa ka barangay sa usa ka lugar aron himoon nga sumbanan, ug sa abag sa munisipyo, ang mga banay nga moapil sa programa, mananom og utanon sa ilang nataran.
Human makatubo ang utanon, magdala sila og tulo ka matang sa utanon ngadto sa ilang tapokanan, timbangon kini og ilatag, aron mapabayloan sa ubang nga ngadala usab og utanon.
Kasagaran nga banay nga manabo nga magdala og tulo ka utanon, mouli nga mag dalag usa ka basket sa kapin sa 20 ka utanon, nga igo usab sa 3 ngadto sa 4 ka luto-an alang sa banay nga may 4-5 ka sakop.
Didto sa Inabanga, gikompirmar sa mga taga ARK nga sa suporta sa Inabanga, napatuman ang ARK Feedback, dili lamang sa usa kon dili sa 16 ka barangay, dili kasarangan nga hitabo sa kasaysayan sa ARK project.
Human sa 8 ngadto sa 9 ka semana, bisan pa sa hulga sa huwaw, napakaon nato ang 3,222 ka banay o kinatibuk-ang 20,700 ka tawo, taho ni Mayor Jumamoy.
Ang kalihukan sa ARK, mao usab ang rason nga gihimo sa lungsod ang Utanon Summit, aron sa maka usa pa, ikapakita ngadto sa mga taga Inabanga nga mahimo ra nga sila ang magsolbad sa suliran sa kaguton ug kalagsik sa mga kabataan, pinaagi sa pagkugi.
Human sa 8 ka semana nga kasinati-an, pugoso ang mga barangay sa lungsod nga ilang ipadayon ang pagpananum ug pagbinayloay sa mga utanon, bisan pa kon possible nga ang proyekto, moadto na usab sa laing mga lugar.
Apan kombinsido usan si Bise Mayor Josephine Socorro Jumamoy nga pangitaan nila og pamaagi nga katugbangan sa ARK ang ilang pundo alang sa pagpadagan na usab sa proyekto sa nahibilin nga 34 pa ka barangay sa lungsod.
Si Mayor Jono Jumamoy, una na nga mipaambit, nga bisan sa wala pa ang Ark, naaghat na siya sa paghipno og susamang programa diha nga iyang nahimamat ang us aka centenarian nga nagbaol pa gihapon.
Kon ang mga Inabangnon, magbaul usab, segurado kita nga mabuhi kita ug walay magutman nga pamilya, dayag sa batan-ong mayor.
Ang Utanon Summit sa Inabanga, mingsagop sa tema nga Baul is Life. (PIA-7/Bohol)
