TAGBILARAN CITY, Bohol, April 25 (PIA) — Gipahimangnoan sa Department of Health (DOH) ang publiko kalabot sa gipakatap nga mensahe sa social media ug messaging apps sa dili tukma nga kasayuran bahin sa variant sa Omicron XBB.
Sa usa ka pahayag, ang DOH nag-ingon nga sa kinatibuk-an, ang COVID-19 adunay mga sintomas sama sa trangkaso sama sa hilanat, ubo, kakapoy, pagkawala sa lami o baho, sakit sa tutonlan, labad sa ulo, sakit sa lawas, kalibanga – ug uban pa.
Alang sa saktong pagdayagnos sa mga sintomas, gitambagan sa DOH ang publiko nga mokonsulta sa ilang doktor o mopaingon sa pinakaduol nga pasilidad sa panglawas.
Aron malikayan ang dugang nga transmission sa COVID-19, ipadayon ang pag-obserbar sa saktong sanitasyon, masking, distancing, ug maayong bentilasyon.
Dugang pa niini, ang pagbakuna nagpabilin nga labing maayo nga depensa batok sa grabe nga COVID-19.
Ang DOH nag-awhag sa publiko sa pagkuha sa impormasyon gikan lamang sa mga lehitimong tinubdan ug plataporma, pinaagi sa mga link ug social media nga gidumala sa departamento. (ECB/PIA7 Bohol)
