IKAW, UNSA’Y IMONG PAPEL SA KATILINGBAN? Ana-a ka ba’y gikatabang o ikatabang ilabina ani-a kita karon sa krisis?
Suma pa ni Helen Thomas, usa ka American reporter, columnist ug author, “We don’t go into journalism to be popular, it is our job to seek the truth and put constant pressures on our leaders until we get answers.”
Ang maong baruganan akua usab nga gigakos ug gigamit sa dayag nga kinabuhi isip usa usab ka journalist o mamamahayag.
Ang taga-media yano-yanuhon ra og saway sa mga tawo nga wala kasabot sa among trabaho ilabina sa panahon nga motuki kami sa nagbagang mga isyu sa nasud sama sa korapsyon, pagpanamak sa katungod ug uban pa.
Daghang mga sakop sa media o press ang nabiktima sa “media killings” tungod sa pagsulti sa kamatuoran. Sakit kaayo pamalandungon!
Ako isip sakop sa print media (newspaper), ang akong trabaho mao ang paghatud sa kasayuran, pagsulti sa kamatuoran ug pagpadayag sa hunahuna’g opinyon sa matag isyu aron matimbang-timbang sa katawhan ug mapanaminan sa mga lider.
Sa mga naligsan (naigo) ilabina sa mga lider o politiko, simple o yano ra ang inyong buhaton: AYAW PAGBUHAT OG DAUTANG MGA LAKANG KON DILI MO GUSTONG SAWAYON ug mabandera ang ngalan sa mga radio ug tv stations ug mga pamantalaan lakip na sa digital o social media.
Kamao kami modayeg kon ehemplo kamo sa mga maayong binuhatan isip mga ‘sinugo sa katawhan’.
Kon nasakitan mo kay “guilty” mo, ayaw na lang mo pangalagad sa katawhan— ambak sa inyong trono!
Ug kon ganahan mo, kamo na lang ang pag-journalists unya kami maoy kritiko o politiko (baylo og posisyon) aron makasinati pud mo sa trabaho sa taga-media nga kon maigo ang mga abusadong politiko, walay laing ibuno kon dili mga “kaso”.
Ang media maoy ‘mata sa katilingban’ ilabina sa mga kahiwian sa mga opisyales sa hugaw ug gubot nga nataran de gobyerno.
Kami maoy ‘tingog sa katawhang dinaug-daug’— kana bisan pa man sa matag karon ug unya ana-a ang hulga sa among mga kinabuhi.
Magpadayon kami sa ngalan sa paghatud sa serbisyo-publiko ug dili mahimong babag ang hagit nga among giatubang kay kinasing-kasing kaming nagserbisyo o magserbisyo sa minahal namong katawhang Pilipinhon (puwera sa wala nagbuhat sa ingon).
Tinuod nga dili perpekto ang media, masayop usab kami ilabina sa mga kaubanan nga nagbuhat og kalapasan sa “ethical standards” on truthful journalism.
“Mortal sin” o bug-at kaayong sala sa journalism ang may gidapigan o “bias” ilabina kon modawat og suhol gikan sa mga politiko o lider nga kaugalingong kabulahanan ra ang gi-ambisyon ug dili ang kaayuhan sa nasud ug katawhan.
Labaw sa among trabaho, “interes sa katawhan” maoy among gipalabi o gipakadak-an ug kana magsugod kom anaay kahapsay ug kalinaw sa nasud. Moturok ang kauswagan sa tanan. Paglaum dili mapukan.
Mao kana ang mahinungdanong papel nga among gipanumpaan ug gibarugang ug kining tanan among gibuhat aron makabaton kita’g patas ug balanseng pamuyo ug pang-gobyerno.
Hilig man namo kini o propesyon gayud, kooperasyon ug pagsabot maoy among gihangyo sa publiko nga among gialagaran.
Trabaho lang walang personalan! Ug magbilin kita og usa ka panultihon gikan sa usa ka sikat nga international journalist aron inyong matino ang among role o papel sa kalibutan, “It is great to be a journalist, because our office is the world.”
Usa ka bulawanong kalipay nga kamo among ma-serbisyuhan tungod sa among
gugma ug pagsalig kaninyo kay kamo ang among mga tinahod nga agalon.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
