ANG mga babag namugna tungod sa walay panaghi-usa ug tinabangay. Kon mag-iyahay ang matag usa sa kon unsa ang ilang gusto, walay makab-ot nga maayo. Ang pangandoy ug tumong sa tawo maangkon lamang kon mapahiluna ang matag bahin sa mga naglangkob sa iyang pagkatawo. Dili lamang kini angay nga sayron apan kinahanglan sabton.Walay katumanan nga maangkon kon dili magkatukma. Hangtod nga magkasibo, hanoy ang katumanan. Ipahiluna ang lawas, hunahuna, pagbati ug kusog. Ipahi-angay sila sibo sa maoy angay. Dili nindot paminawon ang yabag. Wala niini ang unod ug diwa sa usa ka tugtog. Sa atong kinabuhi kinahanglan nga walay mga babag.
Ang kinabuhi gilangkob sa lawas, hunahuna, pagbati ug kusog. Ang atong kaugalingon adunay mga gusto tungod sa pagbati. Apan dili tanan natong gusto maoy natuman. Ang atong lawas mobati ug kakapoy. Ang hunahuna nagtudlo ug sukwahi. Kon kapoy ang lawas, walay igong kusog. Kon tugkaron sa kinatibuk-an, wala magkatukma. Dili piho ug tibuok ang tumong ug panglantaw. Wala magkadima-o. Nagkalandrakas. Unsay mahitabo niini nga kahimtang ug talan-awon? Kon magbaklay paingon sa usa tumong angayan lamang nga padayonon pagsubay ang agi-anan. Unsay mahitabo kon matag duha ka lakang, motipas patuo, pawala ug paatras?
Dili makab-ot sa katuyuan. Ang lawas, hunahuna, pagbati ug kusog angay lamang nga magkatukma. Kon dili magkasinabot kining naglangkob sa kinabuhi, walay mahimong kapaingnan. Tungod kay mamahimong babag ang matag usa. Maoy makapugong sa paglihok. Ang lawas angay nga mapahiluna. Ang matag bahin niini mohimo sa tagsatagsa ka bulohaton. Ang hunahuna dili angay nga motalibagbag. Ang pagbati dili angay nga sukwahi sa gihunahuna ug gusto sa lawas. Kon dili magkatuno, moyabag gayud. Sintunado. Kon dili magkasibo ang tuno, aduna bay diwa nga momugna ug huni? Walay kusog ang mamugna tungod kay banha.
Daghan ang naglantaw nga molampos. Daghan ang nangandoy nga makakita ug nindot nga trabaho. Adunay uban nga gusto nga maka-asawa ug gwapa, buotan, nindot ug lawas, adunahan ug unsa pay uban. Kining tanan mga pangandoy ug tipik sa kinabuing tawhanon. Kabahin sa mga panglantaw ug pangagpas nga sa umaabot nga panahon magmalipayon ang atong kinabuhi. Kinsay dili ganahan ug kalipay? Unsay atong gihimo aron makab-ot ang atong mga gitinguha ug panglimbasog? Hangtod nga atong gihimo ang mga lakang alang sa katumanan niini, walay makapugong nga makab-ot kini. Ang tawo gabok tungod kay gikan sa abog. Apan adunay kinabuhi.
