TUNGOD sa ka grabeng kainit sa panahon nga nasinati karon sa nasud, ang ikaduhang labing-labaw nga opisyal sa Bohol nipahimangno sa publiko nga magdaginot og tubig.
Nagkanayon si Bise-gobernador Dionisio Victor A. Balite, Ph.D nga sa nasinati karon nga grabeng kainit sa panahon angayan nga dili na usik-usikan ang tubig.
Matud ni BG Balite nga kun mahimo angay’ng sawron ang limpyo nga tubig nga ginamit sa pagpanghugas, pagkaligo ug uban pa aron maoy magamit sa pagbisibis sa mga tanom.
Gawas nga makadaginot sa tubig, makatabang usab kini nga momenos ang balayrunon sa konsumo sa tubig, dugang sa opisyal.
Si Balite miingon nga sa katapusan pa lang nga bahin sa nakalabay’ng tuig nangandam na ng daan ang Kapitolyo aron maalkontrahan ang epekto sa kainit sa panahon karon.
Samtang ang Provincial Agriculture Office (PAO) kanunay nga nag-monitor ingon man nagpahigayon og mga seminar ngadto sa mga mag-uuma ug mitambag kanila kun unsay maayong itanom nga makalahutay sa init.
Pagkakaron, wala pa hinoon makadawat og taho ang buhatan ni Balite ug sa PAO nga may nahubsan na nga tinubdan sa tubig ingon man sa mga mag-uuma nga nakasinati og kadaot sa ilang pananom gumikan sa kainit sa panahon. (RTB)
