GILUSAD na ang Bohol Clean Water Alliance kon diin makita ang panaghiusa sa mga nagkadaiyang personalidad nakasabot adbokasiya.
Tuyo ug tumong sa maong grupo nga mag-awhag sa gobyerno nga himoong prayoridad ang hinlo nga tubig mainom ug maayong sistema sa panubig.
Dili lamang pag-awhag apan mahimo usab nga mata arun sa pagbantay sa mga programa sa LGU kabahin sa panubig.
Namahayag ang interim Secretary sa alyansa nga si Manlalaban Marvin Aceron nga ang Dakbayan sa Legazpi didto sa Albay maoy usa sa mga modelo sa “Clean Water system” sa nasud.
Lakip sa mga gihinganlang mga Lungsod nga dunay problema sa tubig mao ang Inabanga, Ubay ug Dauis.
Kon walay mga kakulian, molingkod isip Chairman si Emmanuel ” Willy” Ramasola , samtang si kanhi Balilihan Councilor Esteban “EB” Chatto maoy Vice Chairman .
Interim president si Ronnie Orillosa nga bag-o lamang gipasidunggan sa gipahigayong YouthLead Dedication Ball didto sa Dakbayan semana na ang nilabay.
Si kanhi PENRO Nestor Canda maoy mahimong Treasurer.
Giklaro ni Orillosa nga dili political ang maong grupo ug dili pugos ang pagpirma sa Manifesto of Support.
Dugang pa niya, “Inclusive ni for everybody. Dili ni exclusive to somebody. “
Nisalmot usab sa launching si Atty Jordan Pizzaras ug namahayag , “Mas daghan pang namatay sa hugaw nga tubig ikompara sa giyera.” (Kahlil Lester O. Camba)
