IKAW ba, usa sa mga kusog magbanha kon may pagahimoon nga pagkontrolar sa kadaghanon sa layaw nga iro, apan ang imong iro, imong gipasadgan nga walay bakuna, wala marehistro ug wala gani tarung katulganan?
Kon ikaw kini, balikog ang imong prinsipyo kay dili ka sa pagkatinuod, responsible nga mamuhi og hayop.
Matud sa Provincial Veterinarian’s Office, ang responsible nga mamuhi-ay og hayop, maneguro nga ang ilang hayup nga binuhi, rehistrado ug bakunado batok sa mga sakit sama sa rabies sa iro, parvo.
Pinaagi sa briefing sa mga information officers nga sakop sa Association of United Development Information Officers (AUDIO) Bohol, gipaambit ni Dr. Christopher Jay Tanduyan ang mga timailhan ug buluhaton sa us aka responsible nga mamuhiay og hayop.
Siya usab magtipig sa registration card sa hayop kay kini maoy basehan sa sunod nga mga bakuna nga ihatag sa hayup.
Kon responsible nga mamuhiay og hayop, maneguro nga permi nga anaa sa iyang epektibo nga paggunit ang iro, aron kini dili maglaag ug mabugnoan sa ubang iro, mao nga kon igawas man ugaling sa publikong lugar, hiktan permi aron dili makasamok sa uban.
Maghatag pod siya sa saktong pag-atiman sa hayup: pinaligo, pinakaon og sakto ug andaman kini og limpyo ug uga nga silonganan.
Ug kon mahitabo nga ang hayop, makakompormiso sa uban kay nakapaak, iyang isumbong dayon sa mga tinugyanan sa barangay ang hitabo sulod sa 24 oras.
Ug kay nakaperuhisyo sa uban, ang responsible nga mamuhiay og hayup, moabag sa biktima nga napaakan, mangabaga sa galastohan sa pagpatambal ug pagpadala niini ngadto sa tambalanan.
Ug kon ugaling, ang pagpaak sa binuhi, tungod sa pagpasagad sa tag-iya sa hayup ug sa wala pagtagad sa mga lagda ilabi na sa mga ordinansa kabahin sa pagpamuhi og hayupan, ang maayong mamuhiay og hayop andam nga manubag sa korte kon ugaling isumbong sa iyang pagkuwang sa lagda sa balaod. (PIA-7/Bohol)
