KINI UNTA maoy ibutang sa tagsa-tagsa ka hunahuna sa atong mga kaigsoonang kabus ilabina nagsugod na ang ting-gutom kay ting-init.
Sa mga mag-uuma, bag-o lang nahuman ang uban og ani sa ilang mga gitanom ilabina ang humay.
Ug kon ana-a may nahabilin sa mga naani, pangkonsumo na lang kay ang kadaghanan sa abot sa umahan, gibaligya na kay gibayad sa utang, pang-allowance ug tuition sa estudyante o pangpalit og sud-an ug mga inadlaw-adlaw nga panginahanglan.
Maong dili ikalalis nga sa mosunod nga mga semana ug buwan, tingpugong na sa pagkaon. Magdaginot na.
Daghan ang walay trabaho ug kon ana-a may trabaho, dili stable o kanunay. Maayo lang kon regular nga empleyado sa gobyerno kay mas bintaha gayud ang ekonomiya kaysa kadtong inadlaw ra ang suweldo.
Ang uban karon ana-a na gayud sa kalisod maong uso ang pangawat ug panulis, kay wala siguro ka-inkansar ang kita ug anaay daghang bayrunon o panginahanglan o bisyo ba kaha.
Karong panahona kon anaay kuwarta, kinahanglan praktikal kita — unahon ang “needs” o panginahanglan kaysa “wants” o gusto. Pasabot, gamiton ang kuwarta sa maayong padulngan sama sa pagkaon, pangbayad sa bill sa kuryente ug uban pa.
Sa kalisod nga gibati karon sa kadaghanan bisan gani mga kuwartahan, labaw usab nga naglisod ilabina minilyon ang utang.
Dili na ikatingala nga anaay mangawat ug manulis sa matag karon ug unya, apan kutob sa mahimo, dili unta moabot sa maong punto.
Kon mangawat ka, tulo ra ang kasagarang mahitabo nimo: magmalampuson ka, madakpan, mapriso ug makulatahan ka o mapatay ka sa pinusilay tali sa otoridad o sa imong gikawatan.
Ang nakapait kon pamilyado ka, luoy ang pamilya nga mahabilin.
Ug labaw niana, maamong sa kauwaw ang dungog sa pamilya ug sa mismong kaugalingon.
Sa mga kawatan ug tulisan, ang mga abusadong politiko ra ang lisod prisuhon o lisod paangkunon. Apan moabot gihapon ang takna nga sila dimalason o gabaan.
Apan politiko ka man o dili, ayaw gayud pangawat kay moabot ra gayud ang panahon nga ikaw mahukman.
Sa ako ng gibalik-balik dinhi, bahala’g unsa ka lisod, dili gayud mangawat aron dili magmahay sa katapusan.
Daghang maayo ug legal nga paagi aron mabuhi o makapanginabuhi. Ayaw pakawala sa paglaum.
Ug nianang tanan, ayaw kauwaw nga mosangpit sa Ginoo aron isugid ang mga problema ug suliran sa kinabuhi aron mahatagan og kasulbaran o grasya.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
