MAINITONG giabi-abi sa Kagamhanang Probinsyal si Ambassador of Russian Federation to the Philippines nga si His Excellency Marat Ignatyevich sa dihang nibisita kini sa atong lalawigan.
Nanguna si Gob. Aris Aumentado sa pagsugat uban nila Provincial Administrator Aster Caberte, Bohol Provincial Tourism Office OIC Josephine Cabarrus ug Special Projects Section Head Metodio Maraguinot Jr.
Ang maong pagbisita mahimong higayon alang sa pagpalig-on sa diplomatikong relasyon tali sa duha ka nasud, posibilidad alang sa sisterhood partnerships nga mopalig-on pa sa turismo, economic cooperation, culture and arts,labor, agriculture, investment ug humanitarian relations.
“We are grateful that the good ambassador chose to visit Bohol and are more than honored to welcome and host you amid the backdrop of our people’s warm hospitality,” matud pa kang Gob. Aumentado.
Kauban ni Amb. Ignatyevich ang iyang kapikas nga si Irina Pvlov, First Secretary ug Consul of the Russian Embassy Yaroslaw Pavlov, Honorary Consul of the Consulate of Russian Federation Armi Garcia ug iyang Executive Assistant nga si Lisa Pangan.
Natuki nila ang pagpahigayon sa Russian Victory Day karong Mayo 9, 2023 kon diin ang Bohol ang mahimong host sa mga bisitang Russian.
Ang Victory Day, usa ka tinuig nga kalihokan sa Russian ug ang maong kasaulogan mahimo usab nga binayloay sa kultura tali sa Pilipinas ug Russia. (Kahlil Lester O. Camba)
